EDITORYAL - Mactan wala kapangandam sa CCLEX

Daghan ang nagdali nga makalabang sa bag-ohay lang giablihang Cebu-Cordova Express Link (CCLEX), kadaghanan dili tungod kay nagdali sila nga makaabot sa ilang destinasyon diha sa Mactan Island kondili para lang gyud makasuway paglabang niini.

Dili hinuon tanang buot molabang sa CCLEX, basta lang makalabang lang. Mao kini ang unang toll bridge dinhi sa Sugbu. Dunay bayad ang gustong makalabang.

Karong Hulyo mas mosamot pa unya ang kahigpit kay kinahanglang dunay RFID stickers ang mga sakyanan.

Apan wala masayop ang pangagpas sa Banat News sa dihang giplanohan palang kining tukoron pipila ka tuig na ang nilabay.

Nga ang mga karsada sa Mactan Island, apil na niini ang sa Lungsod sa Cordova ug Lapu-Lapu City dili pa andam para niini.

Sa pagbukas palang sa maong taytayan sa miaging semana, nakasinati gyud og grabeng traffic sa mga kaniadto mga dalan sa Cordova ug Lapu-Lapu nga mingaw kaayo, apan karon grabe ang pagkadelatar sa mga sakyanan gumikan sa traffic.

Ang pangagpas sa mga kadagkoan sa CCLEX nga 50 mil ka mga sakyanan ang mahimong makaagi sa maong taytayan kada adlaw.

Kun ingon niana kadaghan kada adlaw, kayahon kaha sa mga gagmay’ng dalan sa Cordova ug Lapu-Lapu City ang traffic?

Hangtud karon mayoriya sa mga karsada sa Mactan Island mga gagmay. Ang ilang two-lane roads dili pa gyud tanan 100 porsiyentong maagian tungod sa padayong mga gitukod nga mga dagkong kanal dili sa

kilid sa karsada kondili diha gyud mismo sa aktwal nga karsada. Kung kanal palang gani naglisod na sila kun asa ibutang, makapatuman kaha sila og road-widening nga mao gyuy gikinahanglang buhaton?

Ang CCLEX dako og matabang sa paspas nga paglambo sa maong isla ug sa mga kasikbit nga lugar sama sa Cebu City.

Apan kuwang sa panagana ang mga nagpasiugda niini tungod kay wala man andama daan ang kadalanan sa Mactan. Duna pa rabay ikaupat nga taytayan nga plano sab tukoron gikan Consolacion ngadto sa Mactan.

Maayo tingaling pangitaan sa mga botante ang mga lokal nga mga kandidato o bisan mga kandidato pagka senador kun unsaon kini pagsulbad.