Kon modaog silang Leni ug Kiko
Mas dako ang kahigayonan nga makakolekta ang gobyerno gikan sa mga Marcos og P203 bilyones tungod sa ilang utang sa estate tax, nga ilang giisnab sud na sa 33 ka tuig, maong napilo og kawalo ka higayon gikan sa orihinal nga P23 bilyones nga buhis sa napanunod nilang kabtangan sa pagkamatay ni Ferdinand Marcos Sr. niadtong 1989;
• Kon lahi ang resulta sa piniliay, segurong mapapas di lang ang utang sa estate tax kon dili hasta ang tanang nahukman na nga mga kaso sa ilegal nilang katigayonan);
* * *
• Di na mapugos ang mga sibyaanan sa radyo ug telebisyon sa gobiyerno sa pagsibya sa mga binastos, bugalbugal, nagkatuiris ug way klaro–sa laktod, way kapuslanan–nga mga istorya kada higayon nga ganahan nga mogawas ang presidente human sa tibuok semana nga pagka-tagolilong;
• Daghan nang mabakante nga airtime sa pagpasabot sa katawhan, labi na sa kabataan, unsa kalapad ang kagutom, ka way trabaho ug kahadlok tungod sa way kinutoban nga pangawat ug panghasi sa diktadurang Marcos;
* * *
• Di na mapugos ang mga opisyal ug mga trabahante sa gobiyerno sa pagkatawa aron ingnon nga nalingaw sa taphaw, lisod sabton bisan kapila na balikbalika nga mga pasiaw;
• Tingali makahigayon na sila og paminaw unsaon sa pagduma ang pandemya pinasikad sa siyensiya ug unsaon pagpalambo pagbalik ang ekonomiya pinaagi sa pagmugna og dugang trabaho, pagtabang sa gagmayng mga negosyante ug pagpatuman sa mga lagda nga makiangayon sa tanan, di lang sa mga alyado nga namintaha tungod sa ilang kasikit sa Malakanyang;
* * *
• Matukoran na og kabalayan ang labing kabos nga mga pamilya tungod sa igahin nga P300 bilyones sa mosunod nga unom ka tuig sa hingpit nga pagpatuman sa Urban Development and Housing Act (ang Department of Human Settlements and Urban Development, nga natukod niadtong 2019 aron pagpalambo sa socialized housing, gigahinan lang sa Malakanyang og P700 milyones karong tuiga); ug
• Hingpit nang mapatuman ang Universal Health Care Law, nga molibre sa tambal, doktor ug ospital sa tanang masakiton, kay doblehon ang P188 bilyones nga 2022 budget sa Department of Health (nga napiang sa unang tuig unta sa pagpatuman sa balaod kay gilaslasan hinuon og P10 bilyones ang ilang budget niadtong 2019).
* * *
- Latest
