Barangay sidewalk sa Reynang Siyudad sa Habagatan  

Padayon ang pagsulbong sa kalamboan sa atong nasud apil na ang dakbayan sa Sugbo nga giisip nga Queen City of the South diin makita ang dakong kalainan sa kaniadto ug karon nga panahon.

Nagbuntaog nga mga imprastraktura ang nituyhakaw nga mora’g mga uhong kay lagi adunay mga magpapatigayon nga mibubo sa ilang puhonan nga maoy nagdala og bibo sa atong dapit, dili lang sa dakbayan sa

Sugbo kon dili halos dapit sa nasud daw naglumba sa paspas nga paglambo.

Apan luyo niining tanan, adunay sektor nga nabiyaan ug daw natabonan nga wala na seguro mahatagi og pagtagad ang ilang panginahanglan. Sila ang mga tawong gitawag nga labing kabus sa hut-ong sa mga kabus, kadtong mga walay pinuy-anan nga anaa lang sa daplin sa karsada o aseras nagpuyo.

Gahapong adlawa naagian nako ang tulo ka batan-on nga nangaligo sa daplin sa karsada gamit ang tubig nga miagas sa dakong hose gikan diay sa hinabwa sa construction site diin nagtoo intawon ang mga batan-on nga limpiyo ang tubig kay tin-aw man apan peligro intawon kaayo sa ilang panglawas.

Matud sa mga batan-on nga mao na kini ang ilang naandan ug wala man usab kuno sila nasakit sa pag gamit sa maong tubig ug dili lang sila ang nag gamit niini kon dili ang mga tawo nga anaa nagpuyo sa daplin karsda.

Alang sa uban ang tubig hugaw apan alang kanila usa kini ka blessing nga aduna silay magamit sa pagpangaligo, panglaba ug bisan gani sa pagluto sa ilang pagkaon.

Literal nga street children sila kay naa man gyud sila matawo, nagdako ug nagpuyo hangtod karon kay wala may balay. Apan bisan sa ilang kahimtang ang tulo ka mga batan-on naningkamot diay nga makatapos sa pagtoon gani anaa na sila sa grade 11. Wala na sila mangandoy nga makaangkon og balay kay imposible na kuno, yano kaayo ang ilang gipanawagan nga unta dili na sila abogon sa mga otoridad kay dili na sila makahimo sa ilang module sa higayon nga abugon sila nga sama sa hayop.

Sa sidewalk dapit sa baranggay San Roque maisip nga usa ka komunidad sa mga tawong walay kapoy-an nga nangligid lang sa dalan sulod na sa taas nga panahon.

Lisod kaayo ang ilang kahimtang kay mag iyahay intawon og hipos sa ilang mga butang kong naa nay mga otoridad nga mobadlong kanila, daw hilapon ang kasingkasing sa kaluoy nga akong nasaksihan, kong naa silay kapilian segurado dili nila kini pilion nga kinabuhi.

Kong mokusog ang ulan mag-iyahay usab usab sa pagpangita og dapit kapasalingon. Ingon niini ka miserable ang ilang kahimtang, seguro moingon ang uban nga mas maayong mopauli sila sa probinsya apan alang kanila wala naman silay paulion kay lisod man pud kuno sa probinsya, mas maayo sa syudad kay mamasura lang makakaon naman.

Unta karon nga panahon sa pagpili sa atong mga public servant usa kini sa hatagan og pagtagad kong kinsa man ang mabutang sa pwesto, tawo usab sila nga nagkinahanglan og dakong tabang.