Mas lanog ang mensahe

Gipahinumduman sa Department of Social Welfare and Development (DSWD) ang mga kandidato, labi pa ang mga reelectionist, nga di gamiton ang ilang programa sa pamolitika.

Niining panahon sa kampanya hugot nga gidili alang sa mga kandidato ang pagpanghatag og mga hinabang gikan sa DSWD.

Wala sab itugot ang pagdayan sa ilang mga hulagway diha sa mga dapit diin himoon ang pagpanghatag sa mga hinabang gikan sa nahisgutang ahensiya.

Nindot pamation ang pahimangno sa DSWD, apan mas mahinungdanon ang ilang lihok batok sa mga politikong mapahimuslanon.

Labaw sa mga pulong sa pahimangno, importante ug mas lanog ang mensahe kun lihok ilang pasulti-on.

Mas maayong hatagan og leksiyon sa DSWD ilang mga sakop nga nakigkonsabo sa mga politiko.

Pananglitan, nagbagulbol ang mga molupyo sa mga bukirang barangay sa usa sa mga lungsod sa habagatang Sugbo tungod kay wala ipanghatag ang hinabang sa mga biktima sa bagyong Odette hangtud nga miabot ang mayor.

Matud sa mga molupyo nga gisukong sila sa ilang mga opisyal sa barangay nga magtigom uban sa laing mga molopyo gikan sa laing barangay tungod kay dunay ipanghatag nga hinabang gikan sa DSWD.

Nisayo intawn ang mga molupyo ngadto sa dapit diin gitakda ang pagpanghatag sa hinabang. Apan nadismaya ang mga molupyo nga nagsud-ong sa trak nga puno sa relief goods tungod kay dili pwedeng sugdan ang pagpanghatag hangtud nga moabot ang mayor.

Napugos intawn ang mga opisyal sa barangay pagpasiugda og bingo aron paglingaw sa mga tawo nga nagsugod na og pamalikas.

Sunod adlaw na niabot ang mayor ug naapud-apod ang mga hinabang.

Malikayan unta ang mga hitabo nga sama niini kun di magpagawong sa mga politiko ang mga kawani sa DSWD nga tahasan pagpanghatag sa mga hinabang.

Ug hinaot nakakat-on sab og leksiyon ang publiko aron isalikway ang mga politiko nga mapahimuslanon.