Hunahunaa ninyo pag-ayo

Bisi na kaayo ang mga kandidato sa pagpangampanya sa paninguha nga makadaog sila sa eleksyon karong Mayo 9. Ang ubang kwartahan nga kandidato pagka presidente, gikatahong namayad aron daghan ang motambong sa ilang rally.

Mao nga dili gyud basehanan nga abi kay daghan ang nanambong sa mga rally sa mga politiko nga modaog na sila sa eleksyon.

Angay’ng hinuktokan sa katawhan kon ang ilang mga kandidato nga nahunahunaan, takus ba gyud nga modumala sa nasud ug dili mangawat sa kwarta sa gobiyerno, ug makamao mosilot kon may ilang sakop nga mangilkil.

Kinahanglan nga ang usa maayong presidente mao kadtong makapanalipod sa nasud, dili mahadlok nga molaban sa atong katungod, ilabi na sa isyu nga ang atong teritoryo sa West Philippine Sea gianam-anam na’g ilog sa China.

Para nako, ang tawo nga angay’ng himoong presidente mao ang matinumanon sa balaod, dili kay ang tawo nga molingiw sa iyang kaakohan pagbayad og buhis sa kagamhanan.

Bitaw, kaniadto gusto gyud nako nga si Inday Sara Duterte ang mahimong presidente, apan kay wa man siya milansar, natan-aw nako si Senador Ping Lacson maoy mas haum nga mag-presidente.

Galing lang kay ang mga tawo wa pa kaayo makasabot nga si Lacson maoy mas lapad na og kasinatian ug dili kurakot nga pagkatawo.

May misulti man gud nako nga si Vice President Leni Robredo suod man sa mga walhong grupo. 

* * *

Karong Sabado, ang Cebu Market Vendors Multi-Purpose Cooperative (CEMVEDCO) maghimo sa ilang 18th annual general assembly ug 20th anniversary celebration anha sa SM Seaside Skyhall.

Magsugod ang kalihokan alas 12 sa udto hangtud alas 7 sa gabii, ug raffle. Ang manambong ra ang mahatagan og free ticket sa raffle.

First prize tulo ka tag P10 mil, second prize tulo sab ka tag P7,500 ug third prize tulo ka tag P5,000. Ang fourth prize 20 makadaog og tag P1,000; ug fifth prize 20 ang makadaog og tagsa ka sako nga 10 kilos ganador, ug daghan pa nga premyo.

Ang unang 35 nga sayong moabot hatagan og ganti. Apan ang tanan nga manambong makadawat gyud og tagsa ka sako nga 5 kilong ganador rice.

Matud ni CEMVEDCO chairman Erwin Gok-ong nga adunay libreng sakay sa luyo sa KKD atbang sa Malacañang sa Sugbo ug didto sa ilawom sa Mambaling flyover, pero regular members ra ang makatambong.

Duna sa’y free insurance sa mga nakakompleto sa CGSF sa 2021. Sus, kaanugon nga wa ko magpasakop niining maong kooperatiba, nagplano ra ba ko unta kaniadto. Ambot ang among newscoop, unsa sab kaha ang balita?