Padayon sa pagtabang

Wala lang masayri, napulo na ka tuig ang TAMA, INC. o Tabang Alang sa Maayong Alagad, Inc. human nako kini gitukod niadtong buwan sa Septiyembre tuig 2012 sa Barangay Quiot dakbayan sa Sugbo. Ang TAMA rehistrado kini sa Securities and Exchange Commission (SEC) ug sa Bureau of Internal Revenue (BIR). Simple lang ang katuyoan sa kahugpongan-magtinabangay kun adunay sakop o benepisyaryo sa sakop nga mamatay. Ang mga sakop sa TAMA mag amotay og tag P10 sa panahon nga adunay sakop o benipisyaryo sa sakop nga mamatay.

Ang mga sakop sa TAMA dili individuwal kun dili pamilya. Buot ipasabot, ang P10 nga i-amot dili ibasi sa gidaghanon sa sakop sa pamilya. Pananglit si Pedro adunay napulo ka sakop sa iyang pamilya, P10 ra gyod ang iyang i-amot o ba kaha si Juana aduna lamay usa ka sakop sa pamilya, P10 gihapon ang iyang i-amot.

Ang TAMA walay binuwan o tinuig nga amotan. Mag-amot ra gyod ang mga sakop niini kkun adunay mamatay.

Ang pagtinabangay sa TAMA gipalapdan pa. Niadtong tuig 2020 gitukod ang TAMA Credit Cooperative nga rehistrado sa Cooperative Development Authority diin abli kini sa tanang mga sakop nga gustong magpasakop.

Ang organisasyon may programa usab alang sa panginabuhi sa mga sakop o livelihood program. Ang sunod sa linya sa programa sa organisasyon mao ang pag abag sa mga sakop niini nga makapanag-iya og ilang kaugalingong yuta nga mapatindogan sa ilang mga panimalay. Padayon TAMA sa imong pag abag.

Ako diay nga pasalamatan ang akong mga higala nga mitabang sa pag abag aron magmalampuson ang among ikanapulo nga Anibersaryo ug General Assembly nga gitambongan sa 800 sa 1000 ka sakop nga pamilya.

Akong pasalamatan si Cebu City Mayor Mike Rama, Councilor Edu Rama, Philip Zafra, Raymond Alvin Garcia, Atty. Rey Gealon, Kap Francis Espares, kap Harry Eran, Ronald Grancho sa Grancho Customs Brokerage, Tirso Otar sa TPI Global, Noel Villaceran sa Belgian Marketing, kauban nako sa konseho sa Barangay Quiot Danny Teves, SK Chairman sa Barangay Quiot Justin Murillo ug Quiot Barangay Council.