Di masukod sa rally

Nahimong sentro sa lantugi sa mga supporters nilang bise presidente Leni Robredo ug sa iyang kaatbang nga si kanhi senador Bongbong Marcos ang gidaghanon sa mga mitambong sa ilang rally dinhi sa Sugbo.

Ang duha ka kampo pulos nangangkon nga ang ilang rally maoy dunay mas daghang mitambong.

Ang mga trolls sa kampo ni Marcos mipakita dayon og mga hulagway nga dunay mga bakanteng luna sa dapit diin gihimo ang rally ni Robredo niadtong Huwebes didto sa North Reclamation Area sa dakbayan sa Mandaue.

Ang mga hulagway daling gipakatap sa ilang mga dumadapig. Dili malalis pulos daghan og tawo ang duha ka mga rally. Apan dili na kinahanglang mangumbinsir sila nga ang ilang rally maoy dunay labing daghang mitambong tungod kay di buta ang publiko nga wala makakita sa video ug mga hulagway nga mikatap diha sa social media.

Ang angayang buhaton sa mga trolls ug mga dumadapig sa duha ka kampo mao ang pagkumbinsir sa mga botante nganong ang ilang gidapigan nga kandidato maoy angayang mahimong sunod nga presidente.

Gawas pa dili masukod ang gilapdon ug gibag-on sa suporta alang sa usa ka kandidato basi sa gidaghanon sa mga mitambong sa iyang rally. Daghan ang mga butang nga angayang ikonsiderar sama pananglit sa paglisud-lisud sa mga organizers paghakot sa ilang mga supporters. Sigun sa mga organizers sa Ceboom! Grand People’s Rally ni Robredo, wala hatagi og permit sa Land Transportation Franchising and Regulatory Board (LTFRB)- 7 ang mga bus nga mohakot unta sa ilang mga supporters. Kini maoy hinungdan nga daghan sa ilang mga supporters gikan sa probinsiya ang wala makatambong. Si Director Eduardo Montealto sa LTFRB-7 miangkong wala nila tugoti ang mga bus nga mohakot sa mga motambong sa rally tungod kay dunay kontrata ang mga bus company sa DOTr alang sa ilang libreng sakay. Ug di kuno mahimo nga ang mga bus nga gigamit sa programa sa DOTr gamiton sa rally. Pero ang pangutana, nganong sa rally ni Marcos daghang bus ang ilang gitugotan nga manghakot? Diha pay mga sakyanan sa gobyerno nga gidili unta ubos sa lagda sa Comelec.

Laing hinungdan nganong dili mahimong sukdanan sa suporta ang gidaghanon sa crowd estimate tungod kay gawas nga gipaburot, depende hain kapusta ang polis nga mihatag sa estimate, di sab ka kasiguro  mobotar ba tanang nanambong.

Ang uban nila nikuyog tungod sa artista ug ang uban napugos lang kay ang ilang mga mayor gihatagan og quota.