Makapahibo’ng no?

Dinhi sa Sugbo ug sa ubang mga dapit sa Central Visayas, daghan na’ng mga political rally nga gitambongan og kaliboan ka katawhan, nagdikitay gyud, apan wa may natakdan og coronavirus?

Dili mabangbang ang katawhan nga misalmot sa rally sa mga dumadapig nilang Bongbong Marcos ug Sara Duterte didto sa SRP, unya kaniadtong Huwebes laing rally gihimo sab sa mga dumadapig ni Leni Robredo didto sa Mandaue.

Sa laktod, wa na gyud matuman ang gimando sa Department of Health nga kinahanglang dili magdikitay ang mga tawo nga manambong sa mga political rally.

Gikwenta man gani sa kapolisan ug sa mga organizer sa maong mga rally nga nagpulipuli pagpanghambog sa gidaghanon sa mga mitambong sa ilang kalihokan, nga ang usa ka “square foot” masudlan kuno’g upat ka tawo.

Sa ato pa, pwerte gyud ang panagdikit sa mga nanambong. Pero wa man sab ta makabantay nga midaghan ang natakboyan og coronavirus?

Kon human sa eleksyon mosaka gani ang gidaghanon sa natakboyan og virus, ambot unsaon kaha pagpasabot.

* * *

Nagpadayon karon ang paglubong og dagko kaayong mga tubo sa tubig (mora’g moarang ang tawo sa gidak-on) gikan sa Barangay Busay paingon sa Lahug.

Kabahin kini sa gitawag og Lusaran Bulk Water Project aron madugangan ang suplay sa tubig nga magamit sa katawhan dinhi sa Cebu City.

Gisusi gyud nako didto sa bukid ang kalamboan sa maong proyekto kay daghan kaayo ang nagpakisayod nako niini, sanglit ako maoy nagsige’g balita niini.

Nakapalit na og yuta ang MCWD diha sa Barangay Busay nga anha nila tukoron ang duha ka dagko kaayong tangke nga maoy pundohan sa tubig nga gikan sa Barangay Lusaran.

Matud ni MCWD public information officer Edna Inocando nga gikatakdang moagas ang tubig gikan sa Lusaran mga hinapos sa Hulyo o kaha unang bahin sa Agosto.

Sanglit 20,000 cubic meters nga tubig man ang makuha kada adlaw gikan sa Lusaran, nga gipaagi diha sa kabukiran sa Barangay Busay, dako na kaayo ni og epekto pagsulbad sa kakuwang og tubig dinhi sa ato.

Kadtong mga nagpuyo sa upland barangays, sama sa Busay, Apas, Banilad, Lahug, Pulangbato, ug uban pa, makapakonektar na gyud unya og linya gikan sa MCWD.

Mao nga kinahanglang pagka karon pa lang daan, pagtigum na mo daan og kwarta nga magamit kay aron maka-apply na mo dayon kon magsugod na ang pagpanawat sa aplikasyon.

Ako maoy aktibo kaayo sa paghatag ninyo og kalamboan niini kay usa ko sa makabenepisyo, kay dia ko magpuyo sa bukid nga makapahimulos unya sa tubig gikan sa Barangay Lusaran.