Pabayron ang tagsala

Alang kang Presidente Duterte, angayan nga mobayad sa Pilipinas kadtong mga adunahan nga nasud nga adunay dagkong mga pabrika nga nagbuga og mga carbon gases nga misangpot sa kadaut nga atong nasinati gumikan sa climate change.  Giangkon sa presidente nga naglisod ang Pilipinas pagsagubang sa mga kadaot gumikan sa kastigo sa kinaiyahan.  May punto ang presidente. Magka-datô ang nasud, magka-dako usab ang iyang tampo sa kadaut sa kinaiyahan.  Ang global warming dili na panagná lamang kon dili nahitabo na karon.  Subô palandungon nga daghan pa ang motoo sa ihatag nga tip sa swertres kay sa hisgutanan sa climate change.  Fezteleern!

“Ampô pa’y tigré”

Mayoriya (77%) sa mga nitubag sa bag-ohay lang nga survey nga gipahigayon sa Publicus nagkanayon nga dili na nila usbon ang ilang napilian nga kandidato pagka-presidente.  Nagpadayag ang maong survey sa kalig-on sa baruganan sa kadaghanan sa mga botante ug nga wala na’y purohan nga mausab ang ilang hunahuna kon kinsay botaran.  Dili kini maayong balita alang sa mga nangiwit sa survey.  Apan ginaingon man nga, “Dili pa tapos ang salida kon dili pa mokanta na ang tambok nga babaye”.  Busa kumbati lang gihapon sa pagpangampanya. Sa taga-Dalaguete pa, “Ampô pa’y tigre’.  Ateerr!

Hangol sa gahom

Mipasidaan si Secretary Melvin Matibag, kinsa mao usab ang secretary general sa PDP-Laban-Duterte faction, nga mahimo’ng mopuyô pa ang Presidente sa Malacañang lapas sa Hunyo 30, kon ugaling adunay mahitabo nga pag-destabilisar sa eleksyon ug kon walay mapili nga presidente.   Ni,ng maong pasidaan, daw gikondisyon na’ng daan ang hunahuna sa tawo. Duha ka hut-ong ang tawo sa katilingban: ang herarkiya nga hangol sa gahom ug ang katawhan nga walay gahom.  Walay nasud, bisan unsa ka tarong sa katuyoan, nga wala matakdi sa kagaw sa pipila nga hakog ug gutom sa gahum.  Madahaaan!

Mangutang aron makapasi-atab

Nangayo’g panabang ang Securities and Exchange Commission (SEC) sa Google aron masanta na ang mga ilegal ug abusado’ng pamaagi sa mga lending apps diha internet.  Ang maong hangyo giuyonan sa Google.  Tungod sa panginahanglan, ang tawo makapangutang.  Ginaingon man gani nga “ang pagka-utangan maoy labing laksot nga matang sa kakabos”.  Angayan tamdan ang tambag nga, “Aron dili malubong sa utang, ayaw’g palit sa mga butang nga dili makaya sa bulsa, ginamit ang kwarta nga wala pa nimo makita, aron lang makapang-hambog sa mga tawo nga dili gani nimo kaila”.  Fishkots!

Naluwas sa refrigerator

Naluwas sa piho’ng kamatayon ang usa ka bata’ng lalaki sa nahitabo’ng landslide sa Baybay City, Leyte human siya motagô sulod sa refrigerator.  Nagpaalim na siya karon sa hospital.  Karon pa ko nga bisan kon walay kuryente magamit diay gihapon ang refrigerator.  Kon mag-andar kini, mapreserbar ang mga karne ug uban’g pagkaon; apan kon palongon kini, mapreserbar na gyud hinoon ang kinabuhi.  Ni’ng higayona, dili ang kabtangan maoy giluwas sa tawo, hinonoa, ang tawo maoy naluwas sa kabtangan.  Pagka-tulokibon!