Uniteam Festival Rally-Cebu makatandog

Abril 18, 2022. Sayo pa lang sa kahaponon, nag-abot-abot na ang nagbahang Bongbong Marcos-Sara Duterte (BBM-SARA) supporters sa halapad nga wanang sa Cita de Mare, Filinvest Grounds, South Road Property, Coastal Road aron motambong sa Uniteam Festival Rally – Cebu.

Pagka gabii, wala lang mapuno sa mga dumadapig ang maong venue nga daw miporma’g kilometro ang gidak-on nga gikuwadro. Miawas pa hangtod sa gawas.

Sa drone shot, makita ang dakong lawod sa katawhan nga nagpunsisok, kang kansang kahayag sa mga cellphone morag aninipot nga giwarawara nila samtang nagpaninggit sa ngalan nila ni Presidential ug Vice-Presidential aspirants: BBM ug Inday Sara.

Sa nawong ni BBM mihulma ang unsay gibati sa iyang kasingkasing, kinsa atubangan sa gibanabanang moabot og 200,000 ngadto sa 500,000 nga katawhang nanambong, miingon: ‘Nga sa tanang rally nga ilang gipasiugdahan sa tibuok Pilipinas diin pirme sab gidumog og daghan, ang Cebu mao kunoy nakadalit og kinadaghanang supporter nga nakapanglugmaw sa iyang mga mata.

Sa adlawan, hilabihang inita. Apan wala mapugngi ang pagdagsa sa mga tawo. Sa gabii, may saag ulan nga gustong mobungkag sa bagang duot sa katawhan. Pero walay bisan usa nga mibulag palayo. Padayon ang pagdugang sa midagsa nga walay kukahadlok mabasa.

Gani, sayo pa sa buntag, ubay-ubay nang BBM-SARA Uniteam supporters ang nangabot bisag wala pa makapamahaw. Dinhi gimatuod sa mga Sugboanon unsa ka lunod-patay silang mosuporta sa Untieam. Ulan? Init? Paglabay’g lapok? Dili kini kanila makadulot. Hinuon, mopasamot pag kahugot sa ilang paggakos-protehir sa Uniteam.

Mga kaatbang nagpunay’g labay og lapok ngadto ni BBM. Nangangkon nga ang Cebu ilaha ug dili kang BBM.

Ug kon mohimo kunog rally si BBM sa Cebu, igo ra kining langawon. Apan unsay nahitabo?

Dihang pinale nang mihukom si Cebu Governor Gwen Garcia nga ang BBM-SARA Uniteam ang suportahan sa ilang One Cebu, One Province nga partido, wala kapugngi ang pagbaha sa nag-awas-awas nga kadaghan sa mga dumadapig nga midugok sa Uniteam Festival Rally sa Cebu.

Diin, hasta mga magkakontrang partido nga LGUs, gihiusa ug nagkahiusa. Kon kaniadto, sila magkaaway. Karon, sila managhigala na.

Pagkatulukibong yugto! At least, sa Uniteam, sila nakat-on sa paghigugma sa ilang kaaway.

Kaanindot nga sinugdanan sa kahiusan. Makatandog!