Ang survey ug ang silent majority

Gibaliwala lamang ni Senador Panfilo “Ping” Lacson ug Senate President Vicente “Tito” Sotto III, kandidato sa pagka presidente ug bise presidente sa umaabot nga Mayo 9 nga eleksiyon ang resulta sa survey sa mga survey agency diin dili sila maoy nag una. Ang duha miingon nga ang resulta sa mga survey nga gihimo wala motukma sa mga town hall campaign nga ilang gihimo diin gitambongan kini sa daghang mga tawo.

 Si Lacson ug Senate President Sotto miingon nga ang resulta sa mga survey mind conditioning lamang.

 Ang survey scientific busa ang resulta niini maoy gihimong basihanan sa mga partido o kandidato sa pagahimoon nilang lakang sa pagpataas sa ilang ranking sa preference sa mga botante.

 Tinuod ang gisulti ni Lacson ug Sotto nga ang resulta sa mga political survey mind conditioning. Apan dili siyento porsiyento ang pagkatinuod niini tungod kay mahimo lamang nga siyento porsiyento nga tinuod kini ngadto sa mga wala pa makadesider kinsa ang kandidato nga ilang boto.

 Sa mga nakahukom na kinsa ang ilang iboto nga kandidato basi sa ilang paghashas ug pag-ila kanila ug sa mga plata porma de pang gobiyerno sa kandidato lisod nang matuis ug ma-condisyon ang ilang huna-huna busa wala nay epekto kanila ang resulta sa mga political survey.

 Ang resulta sa mga political survey dili pod ang ultima ora nga basihan kinsa ang modaug nga kandidato tungod kay dili pa man kini final. Kay ang final nga survey nga maoy moila kinsa ang modaug nga kandidato mao man ang adlaw sa eleksiyon o piniliay.

 Sa political survey aduna lamay kapin sa usa ka libo ka mga respondents ang gipangutana kinsa ang ilang botaran nga kandidato sa nasudnong posisyon, sa final survey o adlaw sa eleksiyon adunay 67.5 milyon ka mga respondents nga botante ang pangotan-on diin 65.7 milyones niini mga botante dinhi sa nasud sa Pilipinas ug 1.8 milyon niini ang mga botante didto sa gawas sa nasud.

Sa eleksiyon day motingog na ang silent majority ug ato nang mahibaw-an kinsa ang kandidato nga ilang iboto.