Binignit

Ambot kinsay nagpauso niini, apan ang binignit kabahin na sa tradisyon sa mga bisaya panahon sa Semana Santa.

Matag mahal nga adlaw di gyud mawala ang binignit sa talad kan-anan sa mga Sugboanon.

Alang sa mga bisaya daw nahimo na nga simbolo sa puasa ang pagkaon og binignit.

Way direktang relasyon ang binignit ug relihiyon. Apan ang simbahan nagtudlo nato nga ang Semana Santa maoy panahon sa pagpalandong ug pagpuasa.

Sigun sa kaparian, ang puasa nagpasabot og paglikay sa imong naandan dili lang sa pagkaon kun dili lakip na sa ubang mga butang.

Pananglitan og naanad ka og suroy sa mga ordinaryong adlaw, mohunong ka usa sa imong suroy niining maong panahon.

Ug naanad ka og habhab og karne sa matag-adlaw, panahon sa Semana Santa pugngi una ang imong kaugalingon.

Ang katiguwangan nga labihan ka relihiyoso maoy istrikto kaayo sa pagdili pagkaon og karne atol sa Semana Santa.

Ug tungod kay kinahanglan lagi kunong magpuasa, naandan nila nga lagutmon sama sa kamote, saging, balanghoy ug landang maoy ilang kan-on atol sa maong panahon.

Salamat sa kamamugnaon sa atong katiguwangan, ilang nadiskobrehan ang lamian nga putahi sa binignit nga maoy nahimong paborito nga pagkaon natong mga bisaya panahon sa Semana Santa sukad pa kaniadto hangtud karon.

Nahimo na sad ni nga tradisyon hapit sa tanang pamilyang bisaya ang pag-andam og binignit atol sa Semana Santa. Tradisyon nga gipasapasa gikan sa katiguwangan hangtud sa bag-ong henerasyon.

Gani dunay ubang pamilya nga pulos binignit ang kan-on sukad sa Huwebes hangtud sa Sabado.

Busa alang sa mga dunay problema sa kabuhi, andama inyong kaugalingon kay panahon na sab sa puasa.

Nahinumdom ko sa akong higala nga giimbitar sa iyang amiga sa usa mga lungsod sa habagatan atol sa Semana Santa.

Sigun sa akong amigo nitukar iyang kabuhi kay sulod sa tulo ka adlaw--Huwebes hangtud sa Sabado--- binignit ilang pamahaw, paniudto ug panihapon apil na ang snacks.