Yukbo ko ni PJ

Bilib ko ni Kongresista Pablo John Garcia kay wa gyud siya mokuyog sa ilang grupo sa One Cebu nga miendorso sa kandidatura ni kanhi senador Bongbong Marcos sa pagka presidente sa umaabot nga eleksyon.

Gani, mi-resign siya pagka Secretary General sa One Cebu diha nga nahibaw-an niya ang plano nga ang ilang grupo nga gipangulohan sa igsoon niyang gobernador, motuboy ni Marcos isip ilang presidente.

Ang isyu sa pagdumili ni Bongbong pagbayad sa P203 bilyones nga Estate Tax sa kabtangan nga napanunod nila sa namatay nilang amahan, maoy labing una nga rason ni Kongresista Pablo John nga di siya ganahan ni Marcos.

Si Pablo John nga naila sa angga nga “PJ” mihulagway nga alang kaniya, si Manila Mayor Isko Moreno maoy haum nga kandidato pagka presidente sa nasud kay wa gyud kini bisan gamay’ng isyu.

Si Isko Moreno pagkakaron anaa pa sa ikatulong dapit sa mga popularity survey sa tibook nasud, apan sa ubang mga lugar sama sa Mindanao, si Isko Moreno nag-una ug gibiyaan niya ang ubang kandidato.

Mas inilog si Isko Moreno didto sa Mindanao, ug ilabi na sa Manila City nga siya maoy mayor. Para kanako, bati gyud kaayo ang gihimo ni Bongbong nga nagdumili pagbayad sa buhis sa gobiyerno.

Sayonan ka nga 1997 pa nga gideklarar nga “final and executory” ang pagpabayad kanila sa BIR og Estate Tax, apan wa gyud nila bayari ang kantidad nga P23 bilyones pa lang niadtong higayona?

Tungod sa paglabay sa 25 ka tuig na nga gilingiw-lingiwan ra nilang Bongbong ang obligasyon nila sa gobiyerno, ang P23 bilyones nagtubo tungod sa multa ug interest, ug karon miabot na og P203 bilyones.

Sa akong giingon kaninyo, ang usa ka bilyon ka pesos, usa ka sako kana nga tag P1,000 nga papel de banko, ug kay P203 bilyones man ang bayranan nilang Bongbong sa kagamhanan, sa ato pa usa ka 10-wheeler truck mapuno sa sinakong kwarta.

Kon si Bongbong makadaug nga presidente sa nasud, kay kuno mao man kini ang migawas sa mga popularity survey, mobayad pa kaha siya sa maong kantidad?

Dili kaha ang unang kamandoan ni Bongbong mao ang pagbungkag sa Presidential Commission on Good Government (PCGG) nga naggukod kanila aron sakmiton ang mga katigayonan nga giingong nakuha sa ilegal?

Dili kaha ipatawag niya ang kadagkoan sa BIR aron pahimoan og lakang aron mawagtang na ang maong obligasyon sa ilang pamilya?

Mangutana ko sa mga misuporta ni Bongbong. Dili ba diay kamo gusto nga mobayad si Bongbong sa binilyon ka pesos nga buhisanan, nga kita gani nagbayad man og buhis gikan sa atong mmga sweldo?