Estate tax dili babag

Gipaboto ni Mayor Isko Moreno sa tibuok kalibotan ang bahin sa P203B estate tax issue sa mga Marcos nga wala kuno mabayari hangtod karon.

Ug kining isyuha, nahisama sa lamiang bukog nga gisaw-an sa pagtukob ug giwisiwisi taman sa ginhawa sa mga gutom nga iro sa politika, kinsa nagtuo nga ang pagbuhat sa ingon, makaindeksiyon og kamandag sa kandidatura ni BBM ug maoy mohatod ngadto sa seguradong kapildehan.

Atong nakita karon, ang dakong bugno sa politika. Usa batok siyam. Mga palaaway kontra sa dili kaantigo mangaway. Mga tigpakaaron-ingnon versus nagmatinud-anon. Mga kandidato sa kabungkagan batok tandem sa kahiusahan.

Nindot unta, kon lunlon plataporma ang hisgotan diha sa pagpangampanya nilang mikandidato. Unta likayan, ang pagdinaotay kay sama ra nga ila sab kining gihimo ngadto sa atong Ginoo.

Gugma ang Iyang gusto. Ug dili ‘hatred’, kasilag o pagdumot! Mao kini ang kinaimportantehang hiyas nga dapat atong makita-masinati, mga botante, diha sa mga pilionon natong kandidato. Ug si kinsa man kanila ang naa niini, dan, siya na!

Ang mga kandidatong mibandilyo niining P203B estate tax controversy aron lang pakaulawan ang kontra sa politika, tilimad-on kini sa usa ka kinaiyang madinumtanon.

Ang estate tax, segun sa akong pagsabot, mahimo rang bayran bisan kanus-a. Mahimo sa adlaw human ikalubong ang nagbilin sa iyang kabilin, o sa mga sunod adlaw, bulan o katuigan. Hinuon, kon dugay ni mabayran, magakadako ang bayranan kay patongan na man og surcharges sa BIR.

Unya, kon imo ning ibaligya, diha ka na mapugos pagbayad niini. Sanglit di mabaligya ang kabilin kon dili mabayran ang estate tax.

Sa laktod, dili kini automatic mandatory and executory. Depende sa manununod kon kanus-a niya ibalhin ang mga titulo sa kabilin ngadto sa iyang pangalan?

Hinungdan, nga kining estate tax issue sa mga Marcos nga gigukod ni Isko, subayonon pa kini. Basin bayag wala pa ma-transfer sa pangalan ni BBM ang maong katigayonan?

Basin bayag atua na kini sa uban nga mao ray nakapahimulos? Kalain uroy nga ikaw ang magbayad, unya dili diay imoha?

Basta, mahimo rang bayran bisan kanus-a ang estate tax. Busa, dili kini makababag ni makaguba sa dalan diha sa pagdagan ni BBM pagka-pangulo sa Pilipinas.