^

Banat Opinyon

Pamalandong

JAV BANATI - Javier Yntig Tapulado - Banat

Semana Santa na usab. Panahon sa pagpuasa.

Tiyempo sa pagpamalandong. Ug mga balaang adlaw nga dumdomon ang mga naandang tulomanon nga dili makapausik sa dugo sa kaluwasan nga giula ni Hesus aron lamang kitang tanan kahatagag kahigayonan nga hingpit makapangwaswas sa atong kasal-anan.

Kitang tanan, lumalabay lamang niining kalibotana.

Kon didto sa langit, gipapili sila si Adan ug Eba unsay ilaha: mansanas ba, o paraiso? Kita usab dinhi sa yuta gihatagag kaugalingong katungod unsay atong pilion: Pulos pag-antos ug pagka-martir sa kinabuhi nga makapa-langit, o lunlon kaharuhay sa pamuyo nga makaimpyerno? Danglog ang kalibotan.

Malinglahon! Pagbantay nga dili ka mailad ug mahidakin-as sa kaalaotan.

Ning mga adlaw sa kuwaresma, diin mahimo nang maka-bonding-bonding ang katawhan sulod sa mga restawran ug dapit-lulinghayawan human mohinay ang pagtinakdanay sa COVID-19, nindot unta kon kita makatultol na simbahan. Mag-ampo pasalamat! Sa kompisalan, moluhod, sa atong sala maghinulsul! Ug sa Pan sa Kinabuhi, mokalawat.

Dapat, maglipay kita. Sanglit ang mga relihiyosong kalihokan alang sa Holy Week nga moduha ka tuig nga gisirad-an, karon abiyerto na ug makita na usab nato linawas nga re-enactment sa Buhing Kalbariyo ug maka-Station of the Cross na usab sa mga naandang bungtod nga kanhi atong adtoan.

Labi na namong Lectors, kinsa may iyaiyang tulumanon sulod ug gawas sa simbahan. Gani, ‘Giuhaw’ na man ko niadtong makanunayon kong pagbatbat sa ikapitong kataposang pulong sa Siete Palabras: “Amahan Ko sa Imong mga Kamot, itugyan ko akong espiritu!” nga naputol human hiwaa sa kapintas ni COVID-19.

Subo palandungon, nga tungod sa pandemiya, pipila sa mga kauban kong speakers didto sa pribadong balay nga among Siete Palabrasan kada Biyernes Santo, mitaliwan na. Lakip ang tag-iya ug ang anak, kinsa maoy mipadayon sa maong tulumanon, atua, gi-recall na sa Ginoo.

Busa, ikatulong tuig na, nga dili na usab kini mapahigayon.

Mao kaha kini ang ipasabot sa ika-unom nga Pulong ni Hesus: “Consummatum est!”  Natapos na ang tanan? Natapos-himo na ang tanang misyon nga gisangon sa Ginoo kanila? Hinungdan, nga dihang giingnan sa Manunubos si Dimas nga ‘Karon, karon dayon, mouban ka Kanako sa paraiso’, sila pod, gipakuyog Niya?

Oh, Amahan namo, hinaot pa unta, nga sila, anaa na sa Imong kiliran.

SEMANA SANTA

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with