FB giabusohan

Nindot ang gihimo sa kadagkoan sa Facebook nga pagsuspenso sa mga “page” niadtong mga grupo nga migamit sa ilang social media platforms sa dili maayong paagi.

Apil nga gisuspenso mao ang mga social media “page” nga gitan-aw nila nga ang nagdumala kaalyado sa New People’s Army (NPA), ug uban pa nga mga lumalaban sa kandidato.

Samtang wa ra ilha sa Facebook kon unsa ang maong kapin na sa 200 ka “page” nga ilang gitangtang, apan gihangop nako kining maong lakang.

Ang tinuod, dili kay mga “page” ra ang angay’ng isuspenso paggamit sa social media platforms niining higayona nga nagkaduol na ang eleksiyon.

Dunay uban nga naggamit gyud og tinuod nga ngalan sa mga tawo, ang uban gani, tinuod gyud nga ngalan, apan nagsabwag sila og mga peke nga kasayuran.

Ang tumong nila mao ang paglibog sa katawhan aron nga adto na kini mobotar ug mosuporta sa kandidato nga ilang gilabanan.

Hinuon, dili sayon alang sa kadagkoan sa Facebook ang pag-ila niining mao nga mga accounts, kay dili man sila suheto sa mga panghitabo sa tibuok Pilipinas.

Para nako, mahimo ra unta nga mogamit sila sa kahimanan sa social media apan kinahanglang tukma ug tinuod gyud nga balita ang ilang ipublikar.

Mao kini nga nakaingon ko nga angay’ng malipay ang katawhan nga pinaagi sa social media, daghan ang mikalit lang nga nahimong “media.”

Ngano man? Kay sa tumang kasayon, ang mga tawo makahimo na pagmantala sa ilang mga opinyon, ug sa bisan unsa nga anaa sa ilang hunahuna, apan daghan kanila ang miabuso.

Daghan usab ang wa makasabot kon unsay mga gidili aron dili sila makasupak sa mga lagda nga gilatid sa cyberlibel law, ug tungod niini, makabasa ka kanunay og daghang libeloso kaayo nga mga sinuwat diha sa social media.

Kami sa media, kanunay’ng gipatambong og mga seminar nga magtudlo kanamo unsaon nga dili makahimo og libeloso nga mga sinuwat.

Gawas pa niini, magbasa pa gyud mi sa mga balaod aron malikayan ang mga gidili.

Ang uban gud diha, motuyo gyud sa paghimo’g mga sinuwat nga gitumong aron gub-on ang dungog sa usa ka kandidato, sa way paghunahuna nga ang ilang gihimo nakalapas na sa balaod.

Usbon nako, ang social media, ang Facebook, nakatabang kaayo kay pinaagi niini, dali ra nga masayod kita sa mga panghitabo sa lainlaing dapit sa kalibutan, apan makahatag kini og peligro kay giabusohan na man sa uban.

Dali ra kaayo ang paghimohimo og mga peke nga account diha sa social media nga naggamit og dili tinuod nga ngalan ug mga hulagway sa mga mananap ug bisan unsa, nga lisud mailhan ang nagsuwat.