Nganong batokan ang fake news

Mag-umol ang Commission on Election (COMELEC) og task force nga maoy motan-aw sa mga gipakatap nga dili tinuod nga balita o disinformation nga nakatag may kalambigitan sa pagpahigayon og eleksiyon. Ang Task Force maoy pang alkontra sa Comelec sa nanggawas nga balita nga humana ang eleksiyon kay gipang fill-upon na ang mga opisyal nga balota alang sa Mayo 9 nga bugnong lugaynon.

Giklaro hinuon ni Comelec Commissioner George Garcia nga walay labot sa task force batok fake news ang mga kandidato sa umaabot nga bugnong lugaynon.

Nganong batokan man ang fake news? Sigun sa pagtuon ang bakak mas paspas nga mokatag ug manakod kay sa tinuod. Sa Twitter gipakita nga ang dili tinuod nga balita mas lapad og naabtan nga mga tawo kay sa tinuod nga balita diin ang nag-unang usa ka porsiyento sa dili tinuod nga balita o fake news mikatag ngadto sa tunga-tunga sa usa ka libo ug usa ka gatos ka libo ka mga tawo samtang ang naabtan sa tinuod nga balita milapas lamang sa usa ka libo ka mga tawo. Ang samang pagtuon sa Twitter nagpakita usab nga ang bakak nga istorya gi-retweeted og 70 porsiyento kay sa tinuod nga istorya.

Sa gipahigayon nga survey sa Ipsos nagpakita nga 86 porsiyento sa mogamit og internet sa 25 ka mga nasud miingon nga na-exposed sila sa fake news. Siyam sa napulo ka internet users miangkon nga nabiktima sila sa fake news tungod kay nagtuo sila nga kini tinuod. Ang social media mao ang tinubdan sa misinformation o fake news nga nakakuha og 67 porsiyento ug nagsunod ang television nga adunay 51 porsiyento.

Ang fake news o dili tinuod nga balita miyatak sa dignidad ug integridad sa tawo nga angayan lamang hatagan og tinuod nga kasayoran nga mamahimong basihan sa iyang paghukom ug pagpalapad sa iyang kahibawo nga makatabang sa iyang pagkatawo.

Ang fake news nagpahanap sa utlanan sa tinuod ug bakak. Ang pagkahanap sa utlanan sa tinuod ug bakak makaguba dignidad ug integridad sa tawo.