Kalibog sa bata
Ambot nganong daghan ang mituo ni kanhi senador Bongbong Marcos nga ang unity kun panaghiusa maoy tubag sa higanteng suliran nga giatubang sa atong nasud.
TImailhan ba ni nga napul-an na ang katawhan sa grabing pagkabahinbahin sa nasud tungod sa politika nga bisan sa mini nga paglaom andam mokapyot o daghan lang gyud sa mga Pilipino ang wala makakat-on sa kasaysayan ug dili maghuna-huna sa ilang disisyon?
Kinsa bay di gusto og unity? Apan dili sa tanang higayon ug tanang problema sa nasud, unity ang solusyon.
Nagkinahanglan ang publiko og konkreto nga tubag sa problema sa kawad-on ug uban pang gumunhap nga giatubang sa atong nasud.
Dili masulbad ang kagutom sa daghang mga Pilipino sa panaghiusa. Program unsaon pagpalambo ang kinabuhi sa matag-usa maoy solusyon ug dili kutob lang sa unity.
Natandog ko sa video sa usa ka batang babaye, tingali nagpangidaron og 6 ngadto sa 7 anyos, nga gipadala ni Atty. Elias Espinosa pinaagi sa Viber.
Diha sa video, gipadayag sa bata ang iyang kalibog nganong unity maoy solusyon ni Marcos sa tanang suliran sa nasud.
Sa kalinghod sa iyang pangisip nakahunahuna ang bata nga dunay sayop sa solusyon.
Alang niya imposible nga usa ray solusyon sa nagkalainlaing problema.
Nangutana dayon ang bata og mao ba sab ni ang gihimo sa ubang mga nasud nga ang problema sa kakabus, pagsaka sa presyo sa palaliton, kakuwang og oportunidad sa panrabaho ug uban pa, sulbaron lang pinaagi sa unity?
Kun ang batang linghod og pangisip nakahunahuna niini, dakong sagpa natong mga hamtong ang paglingiw sa kamatuoran.
Responsibilidad natong mga hamtong ang pagsiguro sa maayong kaugmaon sa atong nasud ug sa mosunod ta nga mga henerasyon.
Ug kini atong mahimo pinaagi sa pagsiguro nga husto ang mga tawo nga atong tugyanan sa kaugmaon sa atong mga anak.
- Latest