Personalidad ug politika

Adunay nanawagan nga ang pagpili dili ibasi sa personalidad o kasikat sa usa ka tawo nga magpapili sa eleksiyon. Kay ngano man? Buot ba nilang ipasabot nga ang mga sikat dili makamao o dili epektibo nga pinili nga opisyal sa gobyerno?

Dili ikalimod nga adunay mga pinili nga opisyal sa gobiyerno nga napili dili tungod sa ilang kahibawo kun dili tungod sa ilang kasikat. Dili usab ikalimod nga kadtong mga sikat nga kulang sa kahibawo og napili dili kaayo maayo og performance sa ilang trabaho hinuon maayo silang tawo. Busa mas maayo nga ang atong pilion kadtong mga makahibawo.

Sa lumbaanay sa Senado daghan kanila ang sikat apan wala kanila ang igong katakos ug kahibawo nga mahimong Senador. Ang uban gani kanila nasulod sa mga lehitimo nga mga survey agencies.

Ang Senado training ground kini sa mga umaabot nga presidente ug bise presidente sa nasud. Ang ibutang dinhi mao kadtong adunay mga ligon nga baruganan ug may taas nga panglantaw alang sa kaugmaon sa nasud. Walay luna dinhi ang mga tawo nga igo lamang magpahaum sa ilang personal nga mga interest.

Ang Senado nanginahanglan og senador nga ligon nga mobarog sa interest sa nagkalain-laing sektor sa atong katilingban ug nabantog na sa pagpanalipod sa katungod ug interst sa katawhan.

Si Senador Ana Theresia Navarro Hontiveros Baraquel o Senador Riza Hontiveros haum nga ibalik sa Senado alang sa iyang ikaduha nga termino. Sa iyang unang termino sa Senado iyang napalabang ang mga balaudnon sa Senado nga nahimong balaud nga nanalipod ug nagpauna sa interest sa katawhan sama niining mosunod: RA No. 9502 o Cheaper and Quality Medicine Law, RA No. 9700 o Comprehensive Agrarian Reform Program Extension with Reforms (CARPER) Law, RA No. 10932 o Act Strengthening the Anti-Hospital Deposit Law, RA No. 11036 o Philippine Mental Health Law, RA No. 11166 o HIV and AIDS Policy of 2018, RA No. 11313 o Safe Streets and Public Spaces Act.

Iya usab nga gipalabang sa Senado ang Sexual Orientation, Gender Identity, and Gender Expression o SOGIE. Maayo siya og performance. Kun magpili ibasi sa personalidad kadto lang pod makamao.