Makapugos ba ang kompaniya pagpa-overtime?

Dear Atty. Divine,

Nagtrabaho ko sa usa ka manufacturing company. Karong bag-o nagsige og pa overtime ang among company kay kuwang mi og tawo unya mitaas ang demand sa among produkto.  Dunay panahon nga kapoy na kaayo itrabaho ug sobra sa walo ka oras. Nananghid ko sa among manager nga di una ko mo-overtime sud sa usa ka semana apan mibalibad siya kay di daw namo makuha ang target nga production kun di mi mag-overtime matag adlaw. Ang akong pangutana, mapugos ba diay mi sa pag-overtime matag adlaw bisan kun kapoy na sa lawas? Daghang salamat. — Gerald

* * *

Dear Gerald,

Ang atong balaod nagtakda nga walo ra gyud ka oras ang trabaho sa usa ka trabahante ug kun mosobra gani niini ang oras kinahanglan nga bayran na ang empliyado sa orvertime pay.  As a general rule, dili sab mapugos ang empliyado sa pag-overtime kun supak sa iyang kabubut-on. Apan ang Article 89 sa atong Labor Code naglatid og exception niini panahon sa emergency nga mapugos gyud ang empliyado sa pag overtime kun dunay local o national emergency, o kun gikinahanglan gyud ang pagtrabaho to prevent loss of life or property sama panahon sa sunog, baha, bagyo, linog, epidemya ug uban pang kalamidad, o kun adunay dinalian nga trabaho sa makina, ug sa mga ekipo aron kalikayan ang pagkadaut sa produkto ug pagka-alkanse sa kompaniya, o kun gikinahanglan gyud ang trabaho aron kapugngan ang pagkadaut sa mga  perishable goods, o kun nasugdan na ang trabaho og kinahanglan gyud nga tiwason aron di maapektuhan ang operasyon sa kompaniya. Sa imo nga kaso, kun misaka gyud ang demand sa inyong produkto ug adunay giapas nga production ang company hayan mapugos gyud mo sa pag-overtime apan mas maayo nga inyo sab nga sultian ang manager kun di na gyud kaya sa lawas. Thank you and God bless. — Atty. Divine

* * *

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.