Wala man diay dagita ang dalaga

Makapamastilan naman lang gyud ta aning nahitabo sa usa ka 19-anyos nga dalaga kinsa unang gikataho nga na-missing kay lagi hilabihan ka balaka ug kahadlok nga dili matukib ang gibati sa iyang inahan kay wala naman nakauli ang iyang pinalangga nga anak.

Nakapasamot og kahadlok niya ang chat message niini nga gidagit kuno siya sa wala mailhing lalaki ug gidala na sa kabatoan. Kong ingon niini nga mensahe ang madawat sa ginikanan dili gyud masabtan ang bation nga kahadlok kay basin patyon na ang anak.

Nidangop sila sa kapolisan sa lungsod sa Consolacion ug naabot na gani sa provincial level ang issue diin mimando ang pangulo sa PNP sa lalawigan nga paspasan ang pagsulbad sa na-missing nga dalaga ug imbistigahan ang panghitabo.

Nadamay pa ang pangalan sa PDEA nga unang gikataho nga adunay mga sakop sa ahensiya ang nakig-estorya sa dalaga kabahin sa gihimong transaksyon sa bangko. Apan base sa imbistigasyon sa PDEA dili kini tinuod. Kagabii nahatagan gyud og katin-awan ang tanan dihang nakaplagan ang dalaga kauban ang iyang hinigugma sa usa ka beach didto sa lungsod sa Tabogon.

Naibtan sa tunok ang inahan ug nahupay ang kahadlok kay luwas ang iyang anak gikan sa peligro, apan unsay sunod mahitabo? Unsay bunga sa gihimo niining bayhana? Nakamugna siya og grabeng kahasol dili lang sa iyang pamilya kon dili apil na sa mga otoridad.

Unta wala na madisturbo ang mga pulis, nakaatiman pa unta sila og laing tawo nga gikinahanglan nga serbisyohan o nakatutok unta sila sa uban nga programa imbis magpangita niining bayhana nga wala man diay dagita.

19-anyos na ang iyang pangidaron, nagpasabot nga aduna na siyay igong kabuot nga nasayod unsay epekto sa iyang pagpamotbot, nganong maghimo himo pa man og estorya kong makig uban sa laing tawo o sa hinigugma? naghasol lang gyud mo sa ubang tawo.

Wala man ko mo-judge aning bayhana kay basin naa pay lawom nga hinungdan sa iyang gihimo apan kong ang iyang tumong ug tuyo lang ang pagpaukyab aw mao na ni ang dili maayo.

Pareha gyud aning adunay magkomedya nga naay bomba nga ang mohimo sa ingon mag atubang og kaso. Unta kining mga tawo nga maghimo og “kidnap-me scenario” pasakaan pud og kaso aron motagam.

Kong gustong maglipaylipay maglulinghayaw kauban ang uyab kay basin napul-an na sa ilang balay, nganong iapil pa man ang ubang tawo? Kong dili na gyud kapugngan ang nag uros-uros nga pagbati mananghid og tarong sa ginikanan aron matugotan.

Dili kabayran ang kabalaka nga gibati sa inahan nga gi-torture niya ang pagbati kay wala kiniy tulog pila ka adlaw sa iyang pagkawagtang samtang siya pila ka adlaw naglipay lipay kauban ang iyang uyab, pagka selfish naman lang.

Kong dunay legal action ang mga otoridad sa gihimo sa dalaga maamong pud ang uyab niini kay wala man moreport sa mga otoridad nga anaa kaniya ang babaye.

Leksyon nga angayan kat-onan nga dili magbinuang aron walay maangin nga ubang tawo, gahasol hasol lang.