Gigamit sa politika

Usa sa mga hinungdan nganong naglisod ang kagamhanan sa dakbayan sa Sugbo pagpabalhin sa mga vendors sa Carbon aron hawanan ang Freedom Park ug Warrick Barracks mao ang politika.

Gisakyan sa mga politiko nga buot magpagwapo sa ilang kaugalingon aron pagkuha sa suporta sa mga apektado nga mga vendors.

Ang wala masabti sa mga tindero ug tindera, gigamit ra sila sa mga politikong tigpakaaron ingnon.

Human sa eleksiyon, bisan pustaan pa og baka wala nay bisan usa nila nga mopakita aron pag-unong sa kawsa sa mga vendors.

Bisan anino sa mga kandidato nga nidiskurso ug nag-aghat sa mga vendors nga magsubi-subi ug di mosunod sa direksiyon nga gisubay sa dakbayan dili na motumaw human sa piniliay.

Mao ni subo nga kamatuoran nga angayang hinuktukan sa mga vendors. Niadtong Martes duha ka mga kandidato---Atty. Luke Espiritu ug Walden Bello--ang mipadayag sa ilang pagsupak sa Carbon Modernization Project.

Unsa bay nahibaw-an ni Espiritu ug Bello sa kahimtang sa Carbon? Tataw nga mikabayo lang sila sa isyu basi sa kasayuran nga gihungit nila sa mga nagpakalider sa mga vendors nga ang uban dunay personal nga interest.

Sayop ang kanunay ang gipatuo sa mga nagprotesta nga mga vendors nga mawad-an sila og panginabuhian kun mahinayon ang proyekto.

Kanunay ni nga gibalikbalik sa dakbayan ug sa developer--Megawide--nga way mga vendors nga mahikawan og luna sa Carbon.

Ibalhin lang sila og pwesto aron mahapsay ug mahimong desente ug presentable ang merkado.

Apan dunay mga tawo nga maapektuhan ang ilang personal nga interest-- pananglitan kadtong mga nipahimulos nagpaabang og mga pwesto-- ang maapektuhan hinungdan nga sila maoy nagsigi og sulsol sa mga inosente intawn nga mga vendors.

Ang uban dili gusto sa modernisasyon kay siguradong maputol ilang pagpahimulos sa merkado nga gihimo na nilang mga pinuy-anan.

Nindot ang plano sa dakbayan ug Megawide alang sa Carbon ug wa koy nakitang rason nga supakon gawas lang niadtong dunay mga interest nga maligsan.

Kinsa bay dili buot og moderno, hamugaway, limpiyo ug world class nga merkado?