^

Banat Opinyon

Way pilde-pilde

BALITAHOM - Atty. Jose Marie N. Poblete - Banat

Ning nagsingabot nga eleksyon 2022, nabalaka ang COMELEC kabahin sa mga patay na nga anaa gihapon sa listahan sa mga botante tungod kay ang maong isyu mahimong gamiton aron kwestiyonon ang kredibilidad sa eleksiyon. Matag tulo ka tuig lang ang piniliay busa dako unta og panahon ang COMELEC pagpurga sa listahan sa mga botante.  Makapahinumdum sa estorya bahin sa lider sa kandidato nga nangayo og dakong budget alang sa usa ka presinto.  Sa dihang gidaygan ang lider nga sementeryo man ang iyang gitumbok nga presinto, kampante kaayo kining mitubag nga, “Kahibawo ka Sir, sukad-masukad, wa pa ta mapilde dihang presintoha”.  Pagkatoytoy!

Dako’ng negosyo

Giawhag ni COMELEC Commissioner ang mga kandidato nga magmabinantayon sa mga kalapasan sa ilang mga karibal nga kandidato sa lagda sa pagpangampanya ug nga itaho dayon kini sa ilang buhatan aron ma-imbestigahan.  Sama ra’g “naglana og putot’ ang COMELEC ning ilang awhag kay piho nga walay kandidato nga mopatalinghug niini.  Mura’g tanan man makahimo’g kalapasan, nga mag-agad sa gidak-on sa pundo nga gigahin sa kandidato sa iyang kampanya.  Ginaingon bitaw nga sa panahon nga adunay piniliay, ang kinadak-an nga patigayon sa nasud mao ang “election fraud”.  Fezteleern!

Pasumangil kay nangiwit

Gipanghimakak ni Senador Manny Pacquiao nga mobakwi na siya sa iyang kandidatora pagka-presidente, hinunoa, giawhag niya ang ubang kandidato nga siya na lang ang suportahan.  Dugang pa sa senador nga mo-withdraw lamang siya kon hatagan siya’g senyales sa Diyos.  Wala diay tingale mangayo si Senador Pacquiao og senyales sa Diyos sa wala pa siya modagan pagka-presidente.  Apan dili ba pud diay mahimong isipon nga senyales na gikan sa Diyos ang pagpangiwit ni Senador Pacquiao sa survey? Aduna baya’y panultihon nga, “Hunahunaa una sa dili pa buhaton; dili kay buhaton una, dayon maghimo’g pasumangil”.  Baya no!

“Slightly used”

Gikataho nga mikabat na sa 6,000 ang nangamatay sa COVID-19 didto sa Hong Kong hinungdan nga nahutdan na’g lungon ang maong siyudad.  Aron matubag ang maong kakulangon sa mga lungon, adunay mga kompaniya nga nagtanyag og mga “cardboard coffin” isip alternatibong matang sa lungon.  Aduna kini nagkadaiyang desinyo ug bulok nga gipahaum sa kustombre ug tinuohan sa hingtungdan.  Sa kalisod karon sa panahon ug tinukmod usab sa kompetisyon, hayan sa umaabot adunay punerarya nga motanyag pag-ingon, “Mobaligya usab kami’g ‘slightly used’ nga lungon”.  Madahaaan!

“Forgive vs. four gives”

Nangayo’g pasaylo ang artista nga si Will Smith ngadto sa laing artista nga si Chris Rock human sa nahitabong pagsagpa ni Smith ngadto sa naulahi atol sa 94th Academy Awards.  Nasayran nga nasuko si Smith ngadto kang Rock sa dihang “gikomedyahan” sa naulahi ang asawa ni Smith.  Wala pay natuk-an kay nitulon sa iyang garbo aron mangayo’g pasaylo. “Forgive” ang iningles sa pasaylo; “Four gives” usab ang kasabutan sa nagpautang ug sa nangutang.  Ang una magka-uli ang kabubot-on, apan ang ikaduha, sagad maoy hinungdan sa away kay dili matuman.  Fishkots!

COMELEC

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with