Hadlok sa mga Marcos

Ang kadagkoan sa Bureau of Internal Revenue (BIR) nagpabaya sa ilang trabaho ug maoy rason nga hangtud karon wa makolekta ang binilyon ka pesos nga buhisanan sa pamilya ni kanhi presidente Marcos.

Sigun sa nabasa nato nga balita, kaniadto pa’ng 1997 nga “final and executory” na ang hukom nga ang pamilya sa namatay’ng presidente, may bayranan nga Estate Tax nga mokabat sa P23 Bilyones.

Matud sa kampo ni Manila Mayor Isko Moreno nga tungod kay wa man gyud mobayad ang pamilyang Marcos sa maong buhisanan, ang kantidad miabot na karon sa P203 bilyones.

Si Presidente Duterte nakapangutana kon ngano nga ang BIR wa man gyud makakolekta sa maong buhisanan gikan sa mga Marcos?

Giangkon sa kadagkoan sa BIR nga nagsige lang sila’g padala og demand letter ngadto sa “heirs” sa mga Marcos nga sila si kanhi Senador Bongbong Marcos ug Imelda Marcos.

Kon ordinaryo pa kaha nga mga tawo ang pamilyang Marcos, ingon ba kaha niana ang mahitabo? Wa ba kaha himoi na og lakang sa BIR nga masakmit ang maong mga property nga wa mabayari ang buhis?

Para kanako, ang tukma nga himoon ni Presidente Duterte mao ang pagpatawag sa commissioner sa BIR ug ang mga abogado sa nasud.

Kinahanglang hisgotan nila kon unsay tukmang lakang nga mapugos gyud ang mga Marcos sa pagbayad sa ilang obligasyon ngadto sa kagamhanan.

Katungdanan sa presidente sa nasud nga ipatigbabaw gyud ang balaod, ilabi na ang pagbayad og buhis.

Dili mahimo nga abi kay si Presidente Duterte may gitipigan pa nga kaikog sa mga Marcos kay sakop sa namatay’ng presidente ang iyang amahan kaniadto ug magpangikog siya pagpatuman sa balaod.

Ang P23 billyones nga wa makolektang buhis base sa kwentada niadtong 1997, dako na kaayong kantidad ug makapahimo na kini og daghang proyekto nga kapahimuslan sa katawhan.

Samot na kay ang maong kantidad miabot na og kapin sa P200 Bilyones tungod sa multa ug interest kay wa man gyud bayari ang maong obligasyon sulod sa 25 ka tuig.

Apan mao lagi, maglibog ko kay bisan og si Bongbong Marcos way tinguha nga mobayad sa maong obligasyon ngadto sa kagamhanan, daghang Filipino ang mi-idolo gihapon ni Bongbong.

Naglibog ko nganong gusto man sila nga ang mahimong sunod nga presidente sa Pilipinas mao ang tawo nga dili motuman sa balaod, kay dili man siya mobayad sa buhisanan nga gimando sa BIR.

Usbon nako, final and executory na ang hukom sa BIR kaniadtong 1997 nga ang pamilyang Marcos pabayron gyud sa maong kantidad, ug si Bongbong maoy rehistrado nga “heirs” sa ilang katigayonan uban ni mama niya Imelda.