Lacson sakop sa Baleleng?

Tan-aw nako no, ang rason nga ubos ang popularity rating ni Senador Panfilo Lacson kay mituo ang mga tawo sa propaganda sa kaatbang nga si Lacson “involved” sa Kuratong Baleleng.

Ang tinuod, gilambigit si Lacson sa kaso sa Kuratong Baleleng, apan dili nga siya kauban sa grupo, kondili, gikiha kay responsable kuno sa pagpatay sa mga sakop sa Kuratong Baleleng kaniadtong May 18, 1995.

Si Lacson kaniadto maoy hepe sa Task Force Habagat sa Presidential Anti-Crime Commission nga gipangulohan ni Vice President Joseph Estrada.

Apan pagka 2013, ang Supreme Court mi-dismiss sa kasong murder batok ni Lacson “with finality.” Suheto ko sa kinabuhi ni Lacson kay idolo nako siya.

Dihang sakop pa siya sa Philippine Constabulary, ug dayon PNP, girisgo niya ang kinabuhi paggukod sa mga masinupakon sa balaod.

Tan-aw nako, mosamot kaaktibo ang kampanya batok sa mga gukdonon sa balaod kon siya mahimong presidente. Apan ang mga tawo nalingla sa propaganda.

Ang kinaiya ni Lacson maoy angay nga mahimong presidente sa nasud, kay dili siya corrupt, unya batid na unsaon pagdumala ang nasud, ug nasayod unsaon pagsumpo ang corruption.

Dili niya pasayloon bisan ang iya pa nga mga kaalyado kon makahimo og pangurakot sa kwarta sa kagamhanan. Kon si Lacson maoy modaog, sigurado ko nga dili niya tugotan nga ang China padayong mo-bully kanato ug moilog sa kaislahan sa West Philippine Sea.

Dunay kaatbang ni Lacson pagka presidente nga higala sa mga tawo nga gustong molumpag sa kagamhanan ug peligro kaayo kon kini makadaog, kay mohari ang mga leftist. Ang usa sab wa motuman nga bayaran ang binilyon niyang buhisan.

Duna say laing kandidato, pwerteng daghana og palta sa iyang pagka senador, ug bakakon kay kaniadto, misaad nga kon siya makadaog, mobiya na pagka boksidor, apan wala tumana.

Apan ginaingon nga sa usa ka demokrasya nga nasud, ang tingog sa kadaghanan maoy mopatigbabaw.

Kon ang katawhan dili mogamit sa ilang utok ug ang ipatigbabaw ang pag-uban sa pundok nga nadala lang kay kuno daghan ang motambong sa mga rally sa usa ka kandidato, wa tay mahimo.

Apan kon mamati ka lang gyud sa mga presidential forum, makita gyud nimo kinsa ang angayang himoon lider sa nasud kay abtik kini makakita’g hukom unsaon pagsulbad ang atong mga problema.

Angay’ng hinuktokan sa katawhan, kon kinsa ang ilang gusto, ang tawo nga dili gyud corrupt, o ang mga kandidato nga daghan tuod ang manambong kay ang uban niini gibayran man sa mga tigpasiugda.