Problema sa vote-buying

Matud ni Commissioner George Garcia, aksyonan sa COMELEC kon aduna’y mahitabo’ng vote-buying bisan kon wala’y pormal nga reklamo.  Apan mas maayo kuno kon adunay mopasaka og reklamo ug mohatag og ebidensya batok sa kandidato nga mohimo sa maong salaod nga adunay silot nga pagkabilanggo gikan sa usa ngadto sa unom ka tuig.  Karaan’ng cancion kini sa COMELEC.  Wala pa’y nasilotan tungod sa vote buying.  Sa atong sistema sa piniliay, ang kandidato ug ang iyang kwarta mao kanunay pilion.  Matud pa sa akong amigo, dili vote-buying ang problema; ang problema kay matag eleksyon adunay modaug. Pagkatoytoy!

Sayon ang pagpasangil

Lakip usab nga susihon sa COMELEC ang gikataho’ng pagpanghatag og cash assistance dungan sa pagpahigayon sa campaign rally sa usa ka ka kandidato pagka-Presidente.  Apan wala pa gani makasugod pag-imbestigar ang COMELEC, mipadayag na daan ang tigpasiugda sa rally nga ang gipanghatag nga cash assistance kabahin sa ayuda sa mga apektado sa COVID-19.  Sayon kaayo ang pagpasangil sa vote-buying.  Kay bisan gani ang pag-ingon nimo sa driver sa taxi o tindero sa tahô nga “keep the change”, isipon dayon nga vote-buying. Madahaan!

Pag-ihap ang mahinungdanon

Gisalindot ni COMELEC Commissioner George Garcia ang sugyot sa Namfrel nga mobalik kita sa mano-mano nga paagi sa pag-ihap sa balota sa katarungan nga ang kasamtangan’g balaod sa eleksyon nagtugot lamang sa pagpahigayon sa computerized elections.  Kon transparency ang katuyoan, dili solusyon ang pagbalik sa mano-mano nga paagi sa pag-ihap kay baniog gihapon ang tikas sa maong sistema.  Ang pagpakabana ug pagkamabinantayon sa katawhan maoy tubag alang sa matinud-anon nga eleksyon.  Kay ginaingon man nga, “Ang tinuod nga demokrasya wala diha sa pagbotar kon dili anaa sa pag-ihap sa balota”. Kahooon!

Kabataan ang taming

Imbestigahan sa Commission on Human Rights ang giingon nga pang-abuso sa kabataan pinaagi sa paghimo kanila nga human shields atol sa nagpadayon’ng protesta sa mga vendors sa Carbon Market Development Project agi’g pagtuman sa CHR sa ilang mandato pagpanalipod sa katungod sa kabataan.  Kon unsa man ang katuyoan, dili makatarunganon ang pagpahimulos ug pag-apil-apil sa kabataan.  Adunay panultihon nga “Ang tinuod nga kinaiya sa usa ka katilingban, makita diha sa kon giunsa niya pag-tratar ang iyang kabataan”.  Ang kabataan sama sa mga bulak; walay bisan kinsa ang may katungod moyatak ug modangga sa ilang alimyon.  Fezteleern!

Nalimot sa pinulongan

Nanawagan ang DepEd sa dugang pagpakabana aron sa pagpatunhay sa managlahing pinulongan kon linguistic diversity atol sa kasaulogan sa Mother Language Day Celebration.  Ang pag-gamit sa giingon’g Mother Tounge-Based Multilingual Education gitumong aron makaumol og mga tinun-an nga multi-literate, multi-lingual ug multicultural.  Daghan na sa mga kabata-an karon nga dili na kasabot ug nalimot na gani sa kaugalingon nato’ng pinulongan.  Sa mga hamtong, dili na hinoon kinahanglan ang Multilingual Education.  Paimnon lang ug Empé, segurado nga mopiti-piti dayon ang bâbâ sa binugang nga iningles.  Wat’s da matir!