EDITORYAL - Duna kahay moangkong nanawat?

Subli napung nanawagan ang Comelec sa publiko nga isumbong kun duna silay makitang mga namalit og botos, o vote buying. Matud pa dunay task force nga hulmahon ang Comelec aron pagsusi ug pagimbestigar bahin niini.

Samtang nindot kaayong paminawon, apan duna ba gyuy nangaprisong kandidato bahin niini? O nadiskwalipikang kandidato nga naghimo niini?

Nanagan man gani gihapon ang mga politikong dunay mga pending nga mga kaso ug ang uban nakombikto na man gani tungod sa mga kahiwian, may posibilidad pa gyung modaog.

Sa pagkakaron kay bag-o pa nagsugod ang kampanya, pasimple lang ang estratehiya sa mga kandidato pagpalit og botos. Dunay uban nga ipaagi kunohay sa mga livelihood programs o cash-for-work programs ang pagtunol og kwarta. Pamaagi nga dili halatang gipalit sa kandidato ang pagsalig aning mga tawong ilaha kunohay gihatagan og trabaho.

Laing pamaagi sab ang kunohay paghatag sa mga kandidato og mga relief goods ug uban pa ngadto sa mga biktima sa katalagman o ba kaha sa mga barangay nga ilang bisitahon o kung asa ila mangampanya. Ang mga gihatag, gisulod og mga plastic bags nga dunay printa sa dagway ug pangalan sa kandidato unya duna pa gyuy nanghatag gyud og sobre nga dunay sulod nga kwarta isip financial assistance kunohay para sa mga mitambong.

Lain sab kining mga pa-raffle para sa mga manambong sa mga rallies. Makonsiderar ba kining tanan nga vote buying? Angay tingali kining klaruhon sa Comelec.

Kay layo pa ang Mayo 9, 2022 siguradong magpadayon kining maong sistema hangtud nga dili sila badlungon o moingon ang Comelec nga ilegal kini.

Ini og pila nalang ka adlaw ayha ang aktwal nga pagbotar magbaha sa sab ang mga subre u gang ‘kinamangay,’ padak-anay og kwartang ihatag sa mga kandidato aron siguraduhong sila maoy botaran.

Kinsa mang mga botante ang mobarog batok aning mga kandidatong mamalit og botos. Nga ang tawag ‘ayuda’ o financial assistance para nila?

Kaning awhag sa Comelec maayo, apan duna kahay mokooperar sa ngalan sa katarong ug alang sa limpyo ug hapsay nga piniliay karong mga panahona?