Nagpa-booster na ba mo?

Mao kini ang giapil ni Vice Presidential candidate Davao City Mayor Inday Sara Duterte-Carpio sa pamukas niyang pagpakigpulong niadtong usa sa ilang BBM-Sara Uni-team rally atubangan sa daghang katawhan.

Giklaro ni Inday, nga dili siya gusto’g lockdown. Kay kon mao lamang kini ang saligan, seguradong mamatay sa hingpit ang kinabuhi sa tawo ug sa atong ekonomiya.

Gumikan sa daghan nang nagpabakuna ug pagsunod sa safety health protocols, namatikdang nagakahinay na ang pagtinakdanay. Dakong tinguha ni Inday nga magpadayon na kini.

Hinungdan, nga sa nahisgotang rally, gipangutana niya ang tanang nanambong: “Naka-first dose na ba mo? Nakapa-second dose na ba? Ug nakapa-booster na?”

Siya mipasabot, nga ang pagsulbong og balik sa COVID-19 dakong sagabal sa mga maanindot nilang giplanong pagpabangon pag-usab sa mga mapuslanong butang o kapanginabuhian sa tawo nga walay kukaluoyng giguba sa nahisgotang kagaw. Dapat, hingpit kining mahanaw!

Busa, gidasig ni Inday ang tanang katawhan nga magpabakuna. Sanglit, usa sa ilang mga nag-unang prayoridad, ingkasog sila ang modaog, mao man ang unsaon pagpabalik sa mga nawad-ag trabaho ug ang pagpalig-on sa nagakahuyang tang nasudnong ekonomiya.

Mihalang akong dughan samtang naminaw pinaagi sa YouTube channel, sa ‘straight from the heart’ speech ni Inday.  Lunlon panglantaw para sa kayohan sa tanan halos ang matag pulong nga giladlad sa iyang panahom ilabi na sa iyang paghisgot bahin sa kahimtang sa panglawas sa tawo ug sa atong nasod. Diin usag-usa kanato, may papel nga angay buhaton.

Mao nga dihang nangutana siya: “Naka-first dose, naka-second dose ug nakapa-booster na ba mo?”, wala na ko mopaabot kanus-a tawaga sa Pabakuna.com.

Pagka Marso 18, Biyernes, miadto dayon ko sa SM City aron magpa-booster. Ug kay hagbay rang narehistro, unya diyotay rang nagpabakuna, aw, nahuman dayon! Naglibog ko nganong mingaw ang maong vaccination site?

Well-informed kaha ang mga tawo, ilabi na kadtong mga fully vaccinated, kinsa kasagaran, sama nako, nagtuo nga teksan ug pahibaw-on ra kanus-a ang schedule for booster?

Tabangan nato ang gobiyerno nga dili mausik ang minilyong salapi nga maoy gipalit sa mga anti-COVID-19 vaccines from 1st dose to booster.

Intawon, mga kaigsuonan ko, pabakuna na! Ania ang direct landlines nga makagiya ninyo: 255-7960, 411-0155 ug 411-0100.