Politika nagpaluyo?

Daghan ang nagduda nga ang kampo ni kanhi mayor Tomas Osmeña maoy nagpaluyo aron nga ang mga vendors sa Carbon Public Market mosupak sa pag-modernize sa merkado.

Nakaingon ko nga dili sab imposible kay ang pag-modernize sa Carbon Public Market proyekto man sa administrasyon kaniadto ni kanhi mayor Edgar Labella, ug karon gibanos ni Mayor Michael Rama.

Kon mapanindot gud ang Carbon Market sa mga kaatbang sa politika nilang Tommy, makaingon man ang mga vendors nga mas nindot pa ang administrasyon sa kontra sa ilang giidolo.

Bitaw, dugay na kaayo nga si Tommy nahimong mayor sa Cebu City pero pakyas kini sa pagpanindot sa Carbon Market maoy rason nga nagpabilin nga laksot ang merkado.

Ang wa kaayo masabti sa mga vendors mao nga mahimong gigamit ra gyud sila aron supakon ang proyekto ug nga magpabilin kining laksot atol administrasyon nila ni Labella ug Rama. Wa nila mahunahuna nga tungod sa ilang pagsupak, hayan dili na sila makaangkon og pwesto sa pagatukoron nga modernized Carbon public market.

Ang Market Authority maoy mopili kinsa ang mga vendors nga papanindahon sa modernized market, ug sigurado ko nga kadtong mga reklamador, kawad-an og higayon nga makaangkon og pwesto.

Kaniadtong miaging semana, nahitabo ang kaguliyang sa Carbon kay sa ikaduhang higayon, gigamit nila ang kusog aron nga dili makabutang og puthaw nga barandila daplin sa karsada.

Ang metal railings ibutang unta aron nga magpabilin ang gidak-on sa karsada nga kaagian sa mga sakyanan, ug nga ang mga vendors balhinon sa gitawag og “interim market” nga adto sila makapaninda samtang tukoron pa ang bag-ong merkado.

Mao kini ang mga punto nga angay’ng hinuktokan pag-ayo sa mga vendors, ug nga dili sila magpagamit sa mga politiko, ug ang resulta sila maoy masakripisyo kay magpabilin silang mag-ilaid sa kalisud.

Kon matukod na ang bag-ong public market, sigurado ko nga modaghan ang mga kustomer sa Carbon, dili pareho karon nga mahadlok ka moanha diha.

Ang kahadlok nagumikan kay basin og kuotan ka sa imong kwarta samtang mamili og palitonon, o kaha labnihan ka sa imong mga butang, ug basin madunggaban ka pa.

Mao nga para nako, nindot gyud nga makaangkon kita og bag-ong public market diha sa Carbon. Nakasabot ko nga nahadlok ra gyud ang ubang vendors nga basin og momahal ang ilang abangan sa stalls kon bag-o na ang merkado.

Kini tingali nga aspeto maoy gitan-aw pag-ayo sa administrasyon ni Mayor Rama nga mimando nga pahimoan og kausaban ang Joint Venture Contract tali sa Megawide ug sa siyudad.

Nahangyo man ni Rama ang kadagkoan sa Megawide nga bisan og aprobado na unta ang kontrata, himoan kini og kausaban.