^

Banat Opinyon

Dalan paingon sa kaalaotan

JAV BANATI - Javier Yntig Tapulado - Banat

Nagpadayon ang krisis sa tibuok kalibotan nga nakaapaketo sa mga pobreng nasod sama sa Pilipinas, diin wala pa gani makabangon pagtarong human pakamanga ni COVID-19 ug kulataha sa bagyong Odette, gusto na usab lumsan sa walay hunong nga pagtaas sa presyo sa gasolina, krudo ug petrolyo gumikan sa pagginubatay sa Ukraine batok Russia.

Kini walay labot sa dakong gubat sa politika dinhi sa atong nasod.

Diin, imbes ipakita ang sportsmanship sa tanang mikandidato gikan sa kinagamyan ngadto sa kinatas-ang posisiyon, nag-iyahay hinuog linabayay’g lapok ug migastog minilyon ka pesos aron lang daoton pag-ayo ang kaatbang.

Ug kay nagtuo nga ang ilang gibuhat epektibo, hala padayong nag-usik-usik sa binilyon nilang salapi. Bahala nag hasta kabtangan mabaligya.

Total, mabawi ra man kini kon maoy ma-presidente sa Pilipinas. Ngiga, sa?

Makalibog! Kon ang mikandidato sa kinatas-ang puwesto sa gobiyerno, walay laing tumong kondili ang pagpauswag sa kinabuhi sa katawhan, o ang paghatag og bisag arang-arang na lang nga kabuhian sa atong mga kaigsonan nga hagbay rang nagkamang sa kalisod, nganong miabot man og 10 ka buok ang midagan sa pagka-pangulo? Unta duha ra.

Tulo kinadaghanan.

Dili ba, diha pa lang sa pagpangampanya, mogasto man gyod silag miinilyong salapi alang sa paghayir og mga negosyanteng organizer, kinsa mao nay bahalang mohakot og libolibong binayarang dumadapig ug mosuweldog photo-video editor, kinsa sa ipagawas nga hulagway, maayo kaayong mopadaghan tan-awon sa nangapil pagtambong sa mga rally?

Dili ba tungod kay 10 sila, napulo sab sila nga maglumbaanay paggasto kutob sa pilay makaya sa ilang panudlanan o sa nagpaluyo nila? Kaanindot unta, kon ang ilang igasto, gihatag pa sa mga timawang nanginahanglan. Gipamuhonan man hinuon!

Ang makahahadlok, kon may kandidatong gipaluyohan og underworld businessmen o teroristang grupo, kinsa hagbay rang natinguhang maoy mohari sa Pilipinas.

Kay ingkasog modaog ang ilang gisuportahan, segurado gayod nga himoon na lang kining tawotawo sa humayan.

Ug kutob sa unsay ilang gustong ipahimo, matuman. Bisag ang pagbuhat sa ingon, kanatong mga kabos mopaut-ot pagsamot.

Ning panahon sa kampanya, ang mga presidentiables nahisama sa 10 ka nagkalainlaing dalan nga nagpangamay-kombinse natong mga botante. Ayaw pailad sa mga tigpakaaron-ingnon. Intawon, ayaw pilia ang dalan paingon sa kaalaotan!

COVID-19

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with