Home sweet home, Super Bob!

Kutob sa himasa’g diyariyo, tigpaminaw og radyo ug tigtan-aw og telebisyon, walay wala makaila sa beteranong kolumnista, komentarista ug magsisibyang tri-media personality: Super Bobby ‘Bob’ Nalzaro, kinsa gibansagan sa iyang mga suod og: ‘Bantogang Maglilindog,’ ‘Dangpanan sa mga dinaogdaog’ ug uban pa.

Gani, dihang giimbitar ko og bonggang Christmas party sa Sun Star Superbalita, diin si anhing Ernesto ‘Erning’ D. Lariosa pay Literary Consultant, gisugat man dayon og lamano si Bobby ni Noy Erning dungan ang pagdayeg: “Uy, nia na diay ang numero unong komentarista sa Sugbo! Welcome to the party, Nyor!”

Dili mi suod ni Bobby. Tingale, tungod kay wala man gyod mi magkauban og bonding-bonding with media friends pinaagi sa kaonkaon, inom-inom, kantakanta or sharing explosive current issues over a cup of coffee.  Pero suod kaayo nako ang iyang mga sinulat sa kolum niya ug ang iyang naglanoglanog nga buntagong programa sa radio station DYSS.

Dili kay ako ra. Bisan didto sa akong trabahoan (niadtong wala pa ko moretiro), inig sulod nako sa among Card Sorting room ug sa VIP bar kitchen kada buntag, ang mga empleyado naminaw pod sa nagpakapakang mga komentariyo ni Bobby.  Nga sagad ang panapos-pulong niyang litokon: “Pagkatoytoy!”

Tinuoray, kadaghanan, labi na sa mga kabos, nakadayeg ug misalig pag-ayo sa talento ug kaalam ni Super Bob.

But you cannot please everybody. Dili tanan nalipay sa gihimo niya. Ubay-ubay usab ang nasuko.

Hinuon, bisan sa iyang pagka-hard puncher, may Ginoo gihapon si Super Bob.

Busa, pinangga siya Niya. Hinungdan, nga nagsunodsunod lang ang mga adlaw sa pagsulod-gawas niya sa ospital sugod niadton Disyembre 24, 2021.

Papanguhit sa Ginoo ang maong hitabo. Gihatagag igong higayon si Super Bob sa pagpangandam pinaagi sa paghinulsul sa tanang sala.

Unta, wala niya kini usiki. Gani, si Dimas, kinsa gilansang tupad ni Hesukristo tungod sa iyang pagkamakasasala, kinasingkasing mang nagbasol sa tanang daotan niyang nabuhat.

Sanglit nagtuong impyerno ang mapuntariyahan, mihangyo sa atong Manunubos: “Ginoo, kon ikaw atua na sa paraiso, intawon, hinumdomi ko!” Ug unsay gitubag ni Hesus? “Karon, karon dayon, mahiuban ka Kanako sa paraiso.”

May the Lord bless and keep your soul in heaven, Super Bob.  Home sweet home!