Contingency plan sa Comelec

Duha ka dagkong suliran ang giatubang karon sa Comission on Elections (Comelec-Cebu), ang wa pa gyud molayas nga COVID-19, ug ang mga kadaot nga gibilin ni Odette dinhi sa lalawigan sa Sugbo. Ug kini makaapektar sa ummabot nga Mayo 9 nga eleksiyon.

Gumikan niini, gipangandaman na kini sa Comelec (dapat lang). Si Atty. Jerome Brilliantes, Acting Provincial Election Supervisor, nakigkita na sa  taga-Department of Energy (DOE) mahitugod sa kahimtang sa elektrisidad, diin gipasaligan siya nga panahon sa botasyon, ma-fully energized na ang tibuok lalawigan. Ug dugang niini adunay backup nga mga bateriya nga molungtad og tulo ngadto sa upat ka adlaw.  alang sa mga vote counting machines (VCM) in case mag-brown out. Sa ato pa bahin sa electrisidad, wala nay problema.

Bahin sa internet, ania si Atty. Brilliantes, sumala sa mapatik sa The Freeman: “When it comes to the internet signal, the electoral board have the option to look for a place where there’s a signal to transmit the data from the VCM or better to bring it to the municipal hall where the canvassing area is located.” Sa pagkakaron, ang mga magtutodlo nga moalagad sa electoral board, gibansay-bansay na, niadto pang Marso 1, hangtod Mayo 21. Dugang ni Brilliantes: “Specific instruction is how to operate the VCM and the contingency plan just in case adunay mga technical problems nga mo come up sa election day.” Ingon man, adunay mga pagbansa-bansay bahin sa pag-adopt unya sa new normal gumikan sa pandemic.

Adunay mga medical team sa matag polling center nga mosota sa temperature sa mga botante ug moatiman niadtong nagkinahanglan sa ilang pagtagad.So, it seems nga wala na kitay angay kabalak-an sa  ato unyang pagbotar karong Mayo 9. Pahinumdom lang: Vote responsibly. Kay ang kaugmaon sa atong nasud, mag-agad giunsa nimo pag-exercise ang balaan nimong katungod sa pagpili ... sa laktud, anaa sa imong mga kamot.

* * *

Nindot ni nga balita, kon mahinayon. Adunay mga laraw ang dakbayan pag-put up og gasoline station diha sa South Road Properties (SRP), ug mga livelihood centers sa nagkalainlaing dapit sa dakbayan.

Matud ni kanhi Konsehal Gerry Carillo, chairman sa Cebu City Disaster Coordinating Council, ang tanang matang sa mga public transport vehicles, sama sa mga PUJs, taxis, lakip na ang mga motorcycle taxis (habal-habal), ug mga delivery trucks,  mahimong katubilan diha sa gilaraw nga gas  station, apan, matud pa,  limitihan ang matubil aron walay makabintaha.

“The city will put a limit to the number of liters a customer can avail of to ensure no one will take advantage of the arrangement,” nagkanayon si Carillo. Gikinahanglan usab ang accreditation ug monitoring sa mga driver aron pagseguro nga dili kini maabusahan ug dili himuong negosyo. Samtang si Mayor Mike Rama mimando pag-activate sa mga livelihood centers sa dakbayan. Dili kini pagpakigkompetensiya sa ubang negosyo, kundili paghatag lamang og kahigayonan sa mga molupyo sa dakbayan nga makapamalit sa mga basic commodities sa barato nga prisyo. Mugnaon ang Price Monitoring Council nga langkoban sa mga tinugyanan sa DTI-7, CCDCC, PNP, PA, ug sa Business Permit and Licensing Office, aron pagseguro nga mapatuman ang Price Act.

Nindot, di ba?