Managlahing pagpili

Mibukal na pag-ayo ang kawa sa politika. Hasta kaparian miapil sa pagpangampanya. Imbes maoy iwali ang mga pulong sa Ginoo (hinuon dili tanan), mao hinuoy pirmeng ipasumbingay ang paborito nilang kandidato.

Ug kay gusto mang modaog ilang manok, may simbahan didto sa kaulohan nga gipamutangag dagkong posters sa maong magka-tandem nga kandidato ang atubangan sa altar. Diin, mora na hinuon kinig maoy gipuli sa atong Ginoo. Ug daw nagpasabot, nga mao na ang ampoan sa mga manimbahay.

Tungod niining maong eksena nga nag-trending sa social media, daghang Katoliko ang mipalanog sa ilang kadismaya. Matod nila, nawad-an na silag gana pag-adto sa simbahan. Ug mas gipili nga sa altar sa ilang balay na lang sila mangadye.

Usa ka diyosnong doktor, mitug-an: ‘nga dihang pagsimba niya, pulos pagdaot ngadto sa politiko ug sa administrasyong Duterte ang unod sa giwali sa pari, migawas na lang siya sa simbahan kay giluod naminaw.’

Hinuon, dili tanang pari pareha. Mas daghan ang mitahod sa kamandoan ni Cebu Archbishop Jose Palma, sa dili paggamit sa pulpito, o ambo sa Liturhiya ug talad-Eyukaristiya isip entablado sa pagpangampanya aron maoy botaran ang gidapigang mga kandidato.

Apan subo palandungon dihang may order gikan sa ilang kinalabwan, nga ipabasa ang Pastoral Letter for May 9, 2022 election gikan sa Catholic Bishops Conference of the Philippines kada misa matag Domingo sugod niadtong Pebrero 27. Diin, ang unod napuno sa pagpamolitika. Inderiktang gidaot ang gipanghimaraot nga kandidato ug klarong gipaboran ang nagustoan.

Wala untay problema kon ang gipanghagad nilang kandidato namatud-an nang lig-on, ligdong, utokan, dyenwen ug andam mosakripisyo sa kaugalingon alang sa kahiusahan sa tanan. Pero unsaon, dili man, uy!

Bisan, diha sa iyang tinubagan sa mga interbiyu ug debate, molutaw nga kulang siya sa kaalam. Ug usahay, kataw-an na lamang sa mga kritiko. Nga sa ato pa, bisag unsaon pagsangyaw sa kaparian nga kining ilang kandidato maoy the best, dili gyod mauyonan sa kinabag-an. Usag-usa nato dunay katungod sa pagboto. Adunay iyaiyang panghimbis ug panilaw sa pagpili. May kandidato nga tingale para sa kaparian. Tam-is. Pero alang sa katawhan, pait!

Unta, irespeto ang managlahing pagpili sa usag-usa, kinsa parehong nangandoy og bulawanong kauswagan sa atong nasod.