^

Banat Opinyon

Bata nga babaye nahimong lalaki?

LABTIK - Alan P. Domingo - Banat

Unsang pagka unsaa gyud ang nahitabo sa usa ka inahan nga nanganak sa dakong paanakan sa dakbayan sa Sugbo nga gisultihan siya sa mga staff didto nga babaye ang iyang gihimugso. Nituo ra usab siya kay taga hospital naman ang niingon niya, gawas pa wala siyay panimuot atol sa pag gawas sa bata kay gi-ceasarian section man siya.

Ang birth certificate entry nakabutang nga female ang gender ug igo nalang silang gipangayoan og ngalan sa bata diin ang ngalang babaye ang ilang gihatag nga mabutang sa birth certificate.

Nalipay usab ang magtiayon kay sa kataposan nahatagan na sila og babayeng anak human sa sunod sunod nga lalaki. Gani nagpa-ligate na ang inahan kay nagdahum nga babaye ang ilang kamanghoran.

Ang tanan nausab dungan sa pagkahugno nila dihang ang gidala nga bata gikan sa nursery human sa duha ka adlaw, batang lalaki man ug sila nga mga ginikanan ang nakadiskobre dihang gipahiran nila ang sampot sa bata ug nakita ang pikoy niini.

Daling giadto sa amahan ang hospital staff nganong nahimong lalaki ang anak nga babaye man ang gitug-an kanila sa sinugdanan. Wala nahatag nga pagpasabot ang hospital ug igo lang kuno miingon nga ilisan ang birth certificate ngadto sa pagka lalaki.

Gipasabot sa magtiayon nga nagpa-ultra sound man sila dihang buntis pa apan gusto nilang masurprisa maong wala nila i-gender reveal.

Matud sa magtiayon nga ang taga hospital ang anaay kontrol ug access gikan sa pag-labor hangtod na sa pagpanganak nga nagpasabot nga nasayod gyud sila sa ilang gibuhat ug dili aksidente nga nasayop ang entry sa mga dokumento diin nakabutang ang babaye ang bata.

Mitanyag kuno ang tambalanan nga sila ang mohimo sa DNA test aron maseguro kong ila ba gyud ang batang lalaki nga gitugyan kanila ug mahunong na ang kabalaka ug pangutana.

Apan nabalaka ang magtiayon nga adunay pagmanipula nga mahitabo busa nanawagan sila og independent DNA testing sa bata kay wala man sab silay ikagasto sa pagbayad sa proseso.

Ang Department of Health mohimo og pakisusi sa nahitabo apan giawhag niini ang mga ginikanan nga moduso og formal complaint aron dunay basehan sa ilang himong lakang.

Angayan lang nga mahatagan og katin-awan ang tanan kay dili lalim sa mga ginikanan nga hingtungdan, mas maapektohan ang bata nga posibleng ma-bully inig ka dako na kong walay closure ang isyu niya.

Sa side paanakan gikinahanglan mohimo sad mo og lakang aron makahatag og katagbawan sa inyong kliyente ug kong dunay lapses sa proseso angkonon ninyo dungan sa pagpangayo og pasaylo. Dili man sa adunay switching kon dili ang kadanghag sa pagbutang sa entry sa mga dokumento nga nakapasakit sa pamilya sa bata.

Ang panaakan wala moatubang kanako dihang akong giadto kay kuhaan og habig. Inyo man nang katungod apan kong mohatag mo sa pagpasabot andam usab kami maminaw ug ipadangat sa publiko ang pikas habig sa estorya.

SUGBO

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with