Kinsa may mo-declare nga nabuntog na ang COVID-19?

Nangutana kita niini, tungod kay ang World Health Organization (WHO) mipahimangno man nga kono ‘premature’ pa ang pag-declare og victory over COVID-19. Akong tan-aw, iksakto kining pamahayag ni Mayor Mike Rama nga dili siya mo-petition nga ibutang na sa  Alert First Level ang Cebu City. Sa ato pa, dili kita magdalidali. Ato unang panid-an ug seguroon ang lakaw sa panahon, kon milayas na ba gayud ang virus, diin kini paingon, natunaw ba lang kini, o gidagit ba ni Odette.

Maayo nga seguruon una nato ang tanan, sa dili pa kita mo-relax tungod kay suma sa WHO, sa napatik sa Philippine Star: “It is too early for countries to either declare victory over COVID-19 or give up attempts to halt transmission. This virus is dangerous, and it continues to evolve before our very eyes.”

Sa ato pa, ania pa uban kanato ang virus, mihinay o mikalma lang ang transmission niini, perhaps gumikan sa kadaghan na sa nagpabakuna, bisan tuod og medyo ubay-ubay pa ang nahadlok nga ma-zombie unya sila. Kon magpadayon ang pag-us-os sa mag-positibo, kaylagi, ang Omicron variant giisip man nga ‘high transmissibility’ o kusog mokayanap, apan, ‘lower severity’, o ang matakdan, ilabina kon fully vaccinated na, dili kaayo magrbahinan, mahimo nga mo-relax na kita. Apan, gitambag nga ipadayon gihapon ang pag-observe sa mga basic health standards, sama sa hustong pagsul-ob sa face mask ug paglikay sa mga mass gatherings o pagtapoktapok. Unya kadtong wa pa magpabakuna, pagpabkuna na intwon mo, for your own and every one’s good.

Kon duna moy kaugalingon nga na-imbinto nga panagang batok sa virus, nga mas epektbo kay sa mga vaccines, i-share sa na ngari namo, aron mas daghan kitang maluwas gikan sa bangis nga kagaw. Kita ra bang mga senior citizens, nga dugay nang natanggong sulod sa atong panimalay, gumikan sa atong pagka-vulnerable o daling matakdan sa sakit, naghinam-hinam na pag-ayo nga makahanggab og lab-as nga hangin sa gawas.

In my case, karon nga nahurot na nako pagta-aw ang mga movies sa Netflix, wa na  koy laing mahimo paglingaw ug pagtambal sa kalaay, nag-review na lang ko sa ako nang natan-awan. Nalingaw na man lang pud hinuon ko.

Wa nako motn-aw sa mga series nga daghan ug tag-as kaayo ang mga episode, kay kapuyan ko.

Dihay nahinaykan nakog tan-aw, ang Peaky Blinders, Vikings, Arrow, Money Heights, ug kinabuhi ni Bruce Lee, ambot pila ka oras ang akong nagasto pagtan-aw niini, ug pila ka kaadlawon ang akong pagbilar aron makompleto ang mga episode.

Makatagam uy, tiaw moy wa na kay laing mahimo nga angayan untang buhaton. Ug nakapakulang pa sa imong pagkatulog. Sukad niadto, wa na ko magpatintal pagtan-aw sa maong mga season movies. Ako ning gihisgutan dinhi, aron paghulagway sa kinabuhi sa  mga senior citizens nga gitanggong, mo-tulo na ka tuig, sulod sa panimalay. Dili lalim uy.

Gawas pa, istritko kaayo ang IATF diri sa balay. Ambut subra ra tingali ang ilang pagka-protective sa ilang amahan, nga bisan paggawas sa gate, dili ako tugotan. Maora na lang pud kong na-phobia, hadlok na hinuong mogawas.