Pangita’g resibo

Niining panahon sa kampanya tanang saad imong madunggan gikan sa mga kandidato.

Ang uban hasta kapila na nila ibalik-balik og saad apan hangtud ron wala gyuy natuman.

Dunay ubang mga nagpasubli misaad padayonon kuno ang nasugdan nga mga programa. Duna say nga nagbalhin-balhin na og posisyon apan wa gyuy nausab sa ilang mga saad.

Taliwa niining mga pasalig ug bulatik, mitatak nako ang gisulti ni Bise Presidente Leni Robredo atol sa grand rally nga ilang gihimo dinhi sa Sugbo sa miaging semana.

Matud ni Robredo nga normal na nilang mga nagpapili ang moluwat og mga pasalig, apan sigun niya nga mataghigayon nga mohimo og pasalig ang usa ka kandidato angayang ang una natong pangitaon mao ang resibo o pruweba sa iyang mga nahimo.

Simple apan mahinungdanon kining maong giya aron di ta masayop pagpili sa mosunod ta nga mga lider. Importante ang resibo tungod kay mao ni kamatuoran nga buhaton sa kandidato ang iyang mga saad kun makalingkod sa pwesto.

Kun si Gobernador Gwen Garcia pa ang pasultion—”Buhat ang pasultihon, dili sulti ang pabuhaton.”

Busa ang una natong buhaton pagkilatis sa pagpili og mga kandidato nga atong botohan sa moabot nga eleksiyon mao ang pagsusi sa ilang trackrecord lakip na sa ilang pamilya.

Kun nakabantay mo dunay mga kandidato nga misaad og kalamboan apan way resibo nga ikapakita.

Sulod sa pila na ka dekada nga nangatungdanan ang ilang pamilya apan ang dapit diin siya gikan wala gyud magmalamboon.

Duna say kandidato nga misaad undangon ang pangurakot sa gobiyerno apan siya ug ang iyang pamilya nalambigit sa mga tinunto.

Subo nga huna-hunaon nga bisan sa kamatuoran daghan gihapon ang nagpatunto ug nagpaluyo niining maong mga kandidato.

Bag-o lang akong nasayran, usa sa akong mga higala nagpaluyo diay sa usa ka kandidato nga nagkamuritsing sa mga pasangil.

Wala ko magdahom nga sa iyang estado ug ka intelhente mopaluyo siya sa maong kandidato, busa ako siyang gipangutana unsay iyang nakita?

Nagpaabot ko’ng iyang kumbinsihon pinaagi sa pagpresentar sa plataporma ug mga maayong nahimo sa kandidato nga iyang napilian.

Apan misamot ko og kahugno dihang igo lang ko niyang giingnan nga respitahan ang iyang desisyon ug nga wa siyay rason sa pagpili.

Kun ingon niini tanang botante, naguol ko sa kaugmaon sa atong nasud ug sa mosunod nga henerasyon.