Way klarong listahan

Dul-an na sa P300 milyones ang kantidad sa pundo nga gipagawas sa dakbayan sa Sugbo agi og cash assistance sa mga biktima sa bagyong Odette.

Ang mando ni Mayor Michael Rama, tanang nagub-an og panimay makadawat og P5,000. Klaro ang mando sa mayor apan bisan sa ka tin-aw sa kamandoan nagyagaw ug wala magkadimao ang pagpatuman niini.

Si Rama mismo maoy miangkon niini atol sa flag ceremony niadtong Lunes. Matud sa mayor nga atol sa iyang pagsuroy-suroy sa kabarangayan dunay mga biktima ang miduol niya ug mipakita sa naguba nilang mga pinuy-anan.

Misumbong sila nga wala sila malakip sa listahan sa mga gihatagan sa cash assistance.

Sa pikas bahin dunay mga way pinuy-anan nga gihatagan ug duna say uban nga tagtulo ang gilista sud sa usa ka panimay.

Labihang sukoa sa mayor dihang nasayod niini. Iyang daling gimando ang pag-review sa sistema sa pagpanglista ug pagpanghatag sa hinabang.

Ang Department of Social Welfare Services maoy gitahasan sa pagpanghatag sa hinabang. Apang ang maong buhatan nagsalig sa listahan nga gihatag sa mga barangay kapitan nga kaalyado sa administrasyon ug sa mga sakop sa Mayor's Information and Liason Office (MILO) sa mga barangay nga di nila kaalyado.

Dinhi magsugod ang problema. Sigun na sa akong gihisgotan sa nangaging mga lindog, way mahitabong ligdong ug kasaligan nga pagpanglista kun itugyan sa barangay ug MILO.

Angayang mga tinugyanan mismo sa DSWS ubos sa tabang sa mga sakop sa city disaster maoy mohimo og personal nga pagsuhid sa kabarangayan aron tan-awon ang naguba nga mga panimay.

Sa ingon niini malikayan ang pamolitika diha sa barangay. Ambot giunsa nila sa pagpanglista ug kinsay ilang gitungko nga ilakip sa listahan.

Ang tinuod labihang gubaa sa akong panimay diha sa Barangay Kalunasan tungod sa bagyo. Gani hangtud ron wala mi mahuman og paayo.

Gawas sa among pinuy-anan, usa sa among apartment natukas pud ang atop ug naputol ang income unta alang sa pamilya sanglit nibalhin ang nangabang niini.

Apan hangtud ron wa gyuy taga barangay o taga dakbayan sa Sugbo ang nangutana kinsay tag-iya ining panimay nga wa nay atop.

Wala ko nag-apas nga mahatagan apan ang akong punto mao ang way klarong pamaagi sa pagpanglista kinsay tinuod nga mga nagub-an og panimay.