Kanding ug karnero

Opisyal nang gisugdan niadtong Martes, Pebrero 8, ang kampanya alang sa mga kandidato nga nagpapili alang sa mga nasudnong posisyon. Sa mosunod nga 90 ka adlaw masaksihan ug madungog sa publiko ang nagkadaiyang gimik, bulatik ug makabuhi'g patay nga mga pasalig gikan sa mga kandidato labi pa sa mga pilionon pagkapresidente sa nasud.

Ang mosunod nga mga buwan hangtud sa Mayo 9 nga piniliay mapaabot nga labihan ka init nga siguradong mosampot sa pagkabahin-bahin sa mga Pilipino tungod sa managlahi nga kandidato nga gipaluyohan.

Normal ni sa bisan asang dapit tungod kay ang eleksiyon usa ka proseso ubos sa demokrasya nga labihan ka "divisive".

Apan hinaut nga atong gamiton sa husto ang panahon gikan karon hangtud sa Mayo 9 pagtimbang-timbang kinsay haum ug angayang atong tugyanan sa renda sa pangagamhanan.

Atong kanunay’ng hinumduman nga ang kaugmaon sa atong nasud mag-agad sa klase sa mga lider nga atong pilion.

Bantayi ang mga timailhan sa mga posibleng kawatan. Kadtong mga klarong kanding sungayan apan nagpakakarnero. Sayon rang ilhon kun ang imong kandidatong gisuportahan kanding sungayan o karnero.

Una, susiha kinsay mga tawo nagpaluyo niya. Unsay ilang mga interest kun modaog ang maong kandidato.

Ikaduha, unsay iyang track record? Unsa may nahimo niya ug sa iyang pamilya?

Ikatulo,  tan-awa ang iyang plataporma. Klaro ba iyang programa unsay buhaton kun modaog ug makalingkod sa pwesto?  Apan pagbantay sa mga saad nga imposible sama sa pagkab-ot sa langit ug pagpupo sa buwan ug mga bitoon.

Ikaupat ug maoy labing importante, dili ba kawatan ang kandidatong imong gipaluyohan. Kun ang imong kandidatong gusto hadlok modeklar sa iyang Statement of Assets Liabilities ang Networth (SALN) ngadto sa publiko, tingali duna siyay gitagoan. Angayang atong masabtan nga importante ang SALN pag-ila nangawat ba o wa ang usa ka opisyal ug kawani sa gobyerno.

Diha sa SALN makita sa publiko pilay kantidad sa katigayonan sa usa ka opisyal dihang nagsugod siya sa katungdanan. Kun kalit niburot ang iyang katigayonan human siya nakalingkod angayan niyang ipasabot sa publiko diin gikan ang maong bahandi. Sagad sa mga kawatan sa gobiyerno nasakpan pinaagi sa ilang SALN. Kun magdumili imong kandidato paghatag sa iyang SALN tingali nasayop ka sa imong gipaluyohan ug dili pa awahi ang pagpangita og lain.

Kun tinuod kang nahigugma ug nagpakabana sa kaugmaon sa atong nasud, likayi ang kanding sungayan ug pilia ang karnero.