^

Banat Opinyon

Ang tinuod nga gugma dili mopatay

LABTIK - Alan P. Domingo - Banat

Nakaabot na gyud kita Pebrero, ang buwan sa gugma diin maoy gikahinaman ilabi na sa mga in love nga tawo. Bitaw kitang tanan mahilig man sa gugma-  gugma sa atong kaugalingon, gugma sa atong pamilya ug gugma sa tong isig ka tawo, gawas lang seguro niadtong mga tawong gibansagan nga bitter pero mobati gihapon sila og gugma.

Maayo unta kong mopatigbabaw gyud ang gugma sa dughan sa matag usa kanato aron wala nay gubot nga mahitabo. Apan kini mora’g impossible sa uban kay dili nato ikalimod nga anaa gihapon kini tugbang o ang opposite niini nga ang kaligotgot o kasilag nga usahay mohari sa galamhan nga mosangpot gyud sa paghimo og dili maayo ngadto sa isig ka tawo bisan gani sa miembro sa pamilya.

Sama nalang sa nahitabo sa mag-inahan nga gipusil patay sa sitio San Roque, Barangay Guadalupe niadtong niaging adlaw tungod lang sa wala pagsinabtanay sanglit ang suspek mao man usab ang live-in partner sa biktima.

Ang 31-anyos nga babayeng biktima nakaangkon og samad pinusilan sa iyang ulo nga maoy nakaingon sa iyang hinanaling kamatayon. Namatay usab usab ang iyang 15-anyos nga anak babaye human giapil sa pagpusil sa ulo. Ang 11 anyos nga kamanghoran anaa sa kritilkal nga kahimtang human giapil sa pagpusil sa suspek.

Ang biktima ug ang suspek sa sinugdanan nag-ipon nga puno sa paghigugma. Apan sa nagkadugay napulihan na kini og kasuko nga ni-level up ngadto sa kasilag tungod sa sige og away.

Kanunay manapat ang lalaki ngadto sa babaye panahon sa ilang karambola, dili babaay kon dili lawasay gyud ang ilang away. Maayo unta kong lawasay sa kalipay apan lawasay sa kinulatahay.

Nakahukom ang biktima nga buwagan na ang suspek kay dili na maagwanta ang batasan niini nga hilabihan ka seloso nga maoy naghatod sa iyang kalbaryo. Apan wala makadawat ang lalalki ug nakahukom nga patyon ang babaye ug giapil pa ang mga anak sa biktima.

Pastilan, tungod kay nagpadaug sa kasuko nga maoy mihari sa iyang galamhanan niadtong tungora gipatay sa suspek ang babaye nga iyang gihimugma. Sa usa ka pagpamilok nawagtang ang iyang gibating pagmahal ngadto sa binuhat nga iya untang kaabag sa kinabuhi.

Dili na kini bag-o pa nga panghitabo. Adunay daghan nga susama niini nga moresulta gyud sa dili maayong binuhatan nga sa kauwahian igo nalang sa pagmahay ang tawo nga naghimo sa ingon.

Sa panahon sa kasuko grabe gyud ang pagbukal sa dugo sa tawo nga mapanglimotan usahay sa paghimo og sakto kay ipatigbabaw ang garbo nga mamahala nalang kong unsay mahitabo.

Ang tumang paghigugma matod pa sa kanta makapatay or too much love will kill you nga maoy nahitabo sa managkapuyo. Apan kong ingon naman lang niini makaingon ko nga walay gugma sa sinugdanan pa lang kay ang tinuod nga gugma dili gyud makahimo og kadaut ngadto sa tawo nga imong gihalaran niini.

Labaw sa tanan gikinahanglan nga ang gugma sa Dios maoy ipahari sa atong pagpuyo seguradong mopatigbabaw gyud ang kalinaw sa pamilya.

DEAD

Philstar
  • Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with