Abtik makadungog

Nanawagan si Senate President Tito Sotto kang COMELEC Comissioner Guanzon nga hinganlan niini ang senador nga giingon’g buot mo-impluwensiya sa desisyon sa COMELEC kabahin sa disqualification case batok kang kanhi Senador Bongbong Marcos, Jr., kay kon dili hinganlan, basin  silang tanan mahimong suspetsado.  Sa atong sistema sa gobiyerno diin mipasulabi ang padrino system, ang panawagan ni Senador Sotto usa ka haguka nga pasundayag sa pagpakabana.  Daw namatuod niini ang panultihon nga “Ang sad-an adunay dalunggan nga abtik makadungog sa mga pasangil.” Madahaan!

Madinumtanon nga pangulo?

Nagtuo si Manila Mayor Isko Moreno nga sila si Bise Presidente Leni Robredo ug kanhi senador Bongbong Marcos mahimong mga madinumtanon nga presidente kon sila maoy modaug sa Eleksyon 2022.  Magdumot kuno si Robredo sa mga Marcos ug Duterte ug magdumot usab si Marcos sa mga “pinklawan” ug “dilawan”.  Iya lang sa Diyos ang pagdumot ug pagpanimalos, ug kadtong naghambin niini, daw naglab-as kanunay sa samad sa mapait nga kasinatian.   Kuwidaw kita kay adunay panultihon nga nag-ingon, “Kon buot ka gayod motadlas sa dalan sa pagdumot ug pagpanimalos, pagkalot lang daan og duha ka lubnganan”.  Isip-isip!

Hugaw ang giluwâ

Matud ni Senador Grace Poe ang pag-ila sa minî o pekê nga kwarta nga ipagawas sa mga ATM gimbuhaton sa hingtungdan nga bangko ug dili sa katawhan.  Alang sa senador, dakong pangutana kon ngano’ng nakasulod ang minî nga kwarta sa mga ATM.  Husto ang panahom ni Senador Poe kabahin sa katungdanan sa bangko pagbantay sa gipasulod nga kwarta ngadto sa ATM.  Kining maong anomaliya sa ATM, makapahinumdom sa pagtulon-an sa bibliya nga nag-ingon, “Dili ang mosulod sa baba sa tawo ang makahugaw kaniya kon dili ang mogulâ sa iyang baba”.  “Hugaw” diay ang giluwâ sa ATM.  Fishkots!

Dili mahimo’ng pili-an

Gikataho nga midonar ang China og mokabat usa ka bilyon ka pesos nga balor sa mga ekipo ngadto sa Armadong Kusog sa Pilipinas.  Ang donasyon gilangkuban sa mga nagkadaiya’ng military equipment, engineering equipment ug uban pa.  Lig-on ug pulido usab tingale ang maong mga himan nga gidonar ug dili maingon nga mga trak-trak o mga duwaan lang.  Bisan baniog ang ka-ubos sa kalidad sa mga produkto sa China, ato na lang dawaton ang donasyon sa tumang kahinangop kay libre man.  Kay ginaingon baya nga, “Dili mahimo’ng pili-an ang makililimos”.  Saoonz!

Manginlabot o manghilabot

Gihimug-atan ni US Embassy Charges d’Affaires Heather Variava nga gisuportahan sa Amerika ang demokratikanhong proseso sa Pilipinas ug andam ang Amerika sa pakig-alayon sa mapili unya nga pangulo sa nasud ug posible nga magpadala ang Amerika og mga observers sa umaabot nga eleksyon.  Sayod kita nga ang pag-apil-apil sa Amerika sa mga lokal nga kalihokan sa atong nasud gitumong lamang sa pagpanalipod sa ilang interes.  Kay ginaingon nga, “Kon manginlabot na gani ang Amerika sa eleksyon, sagad aduna kini kauban nga ekonomikanhong katuyoan”.  Mao ba!