Hulga nilang Irving ug Djokovic
Katungod nilang Novak Djokovic ug Kyrie Irving nga di magpabakuna batok sa COVID-19. Sama nga katungod sab sa mga gobiyerno ug mga organisasyon sa kanasuran ang pagseguro nga, taliwa sa duha ka tuig na nga pandemya, di sila mahimo nga mas dakong hulga sa kahimsog sa publiko.
Maong di mapugos ni bisan kinsa silang Djokovic ug Irving nga magpabakuna. Sama nga di mapugos pagpaluag sa ilang mga lagda sa bakuna ang gobiyerno sa Australia para ni Djokovic ug ang National Basketball Association ug homecourts sa Estados Unidos para ni Irving.
* * *
Dakong kawad-on sa tennis ang pagpalayas sa Australia ni Djokovic. Kay mahikawan ang Australian Open sa iyang defending champion ug labing maayo nga magduduwa. Sama nga dakong kawad-on sa NBA ug mga estado nga mahikawan sa usa sa labing masilakong magduduwa sa liga.
Lisod pero makiangayon ang mga paghigpit sa kalihokan nilang Djokovic ug Irving. Kay mas bug-at ang interes sa pagpanalipod sa panglawas sa kinabag-an sa mga atleta ug ubang katawhan nga mahimong mameligro kon gawasnon silang makaapil sa tanang duwa ug sa tanang kalihokan.
* * *
Bisan gitugotan sa Brooklyn Nets nga makaduwa sa pipila sa ilang road games, mawad-an si Irving sa kinadak-an nga bahin sa iyang kita sa suholan ug endorsements. Bisan makaduwa si Djokovic sa pipila ka torneyo motidlom sang iyang kita sa mga daog ug endorsements.
Kinadak-an ang pilde sa ilang karera. Masakripisyo ang damgo sa Nets sa kamapeyonato sa NBA karong tuiga kay di kaapil si Irving sa mayoriya sa ilang duwa, labi na sa playoffs. Mahimong di sab makaduwa si Djokovic sa higanteng mga torneyo sa French Open, US Open ug Wimbledon.
* * *
Angay’ng tahuron ang pagbalibad nilang Djokovic ug Irving sa pagpabakuna batok. Pero di nila ikapamugos sa kalibotan ang ilang pagtuo. Angay’ng panalipdan ang kinabag-an gikan nila. Sa pagsalikway sa bakuna, silang Djokovic ug Irving nahimong mas madanihong ahente sa tinakdanay sa Omicron ug ubang variants:
Mas dako ang kahigayonan nga matakdan sila; ug bisan tingali makasukol sa kagaw ang kalig-on sa ilang panglawas ug immune system
Mas dako ang kahigayonan nga makatakod sila sa senior citizens ug mga masakiton nang daan nga mas peligrong ma-ospital ug mangamatay.
* * *
- Latest
