Pagpahimulos resulta's kalisang

Sa dili pa ta malisang ug mag-panic tungod sa pagsulbong og balik sa gidaghanon sa mga kaso sa COVID-19 dinhi sa dakbayan ug sa tibuok nasud, angayang atong sayran unsay tinuod nga kahimtang sa mga natakbuyan sa sakit ug unsay sitwasyon sa atong mga tambalanan.

Kini aron atong malikayan ang di husto nga mga desisyon ug mga lakang nga posibleng moresulta sa dili maayo ug makasamot lang sa atong kalisud.

Tinuod nga dunay mga adlaw nga sobra ka upat  pil-a ang positivity rate sa dakbayan kun itandi sa 5 percent nga threshold sa World Health Organization.

Pananglitan niadtong Lunes  miabot og 26 percent ang positivity rate dinhi sa dakbayan sa Sugbo.

Kini human 137 sa 527 ka mga tawo nga mipaubos sa COVID test ang nasuta nga positibo sa maong sakit.

Niadtong Lunes duna nay 563 ka mga active nga kaso sa COVID dinhi sa dakbayan. Posibleng nitaas na ni sa pagkakaron. Apan sa maong gidaghanon 34 ra nila ang anaa sa tambalanan. Kasagaran nagpaubos lang sa home isolation (224) ug ang uban tua sa mga quarantine facilities---33 ang naa sa BIC, 64 naa sa mga hotels ug 19 ang naa sa ubang isolation facilities.

Ug basi sa COVID tracker sa DOH, 16.4% lang ang occupancy rate sa 15 ka mga tambalanan dinhi sa dakbayan.

Sigun sab sa talaan sa Emergency Operation Center (EOC), 53 sa 80 ka barangay sa dakbayan sa Sugbo ang dunay kaso sa COVID-19.

Dili angay'ng ipakaminus ang sitwasyon apan di sab husto nga malisang ta sa sitwasyon nga moresulta na hinuon sa sayop nga desisyon.

Ang kalisang maoy atong dakong kontra niining panahona tungod kay mamahimo ning gamiton sa mga mapahimuslanon.

Pananglitan, tungod sa kalisang sa publiko nag-ilog na sa pagpalit og mga tambal sa hilanat, ubo ug sip-on bisan ang uban wala pa kinahanglana.

Nakamugna ni og artificial nga pagnihit sa supply sa tambal nga maoy gigamit nga rason sa mga mapahimuslanon aron usbawan ang presyo sa ilang baligya.