EDITORYAL - Pagpaambit karong Pasko

Dako kaayo ang epekto aning coronavirus disease sa pagsaulog sa kapaskohan sa mga Kristiyano, dili lang dinhi sa Pilipinas kondili bisan sa ubang mga nasud.

Karong adlawa Disyembre 1, 2021 magsadya na unta ang kadalanan apan naa gihapon ang kakulba dalan aning Covid-19 mao nga limitado kaayo ang lihok sa mga tawo.

Tungod sa pandemiya napugngan ang daghang mga sadya nga kalingawan sa mga tawo sa pagsaulog sa Pasko. Makita kini bisan dinhi sa Pilipinas.

Kaniadto bulan palang sa Septiyembre daghan ng mamutang og mga dayan-dayan ug dekorasyon sa Pasko.

Apan karon, daw wala kaayo na maghunahuna ang mga tawo tungod kay nihit kaayo ang pangita karon gumikan kay daghan ang nawad-an og trabaho ug daghan sab ang nangalubong sa utang aron makalahutay aning pandemiya.

Bisan gani ang mga dagkong mga malls ug mga tindahan dili na sama kaniadto kaagresibo sa ilang mga promo ug mga kalihokang makaagni og mga parokyano.

Kini tungod kay halos tanang kompanya naapektahan gyud ang kita sud sa hapit dul-an duha ka tuig.

Dili kay ang ilang kita ra maoy naapektohan kondili hasta gyud ang ilang mga pundo, nahabwa aron makasustinir aron dili manirado aron makaabot ning mga panahona.

Tungod niini, mas gipili nalang sa mga tawo nga ireserba kun unsa man ilang natip-igan o madawat nga kwarta karong mga panahona alang sa salo-salo kauban ilang pamilya bisan gamay karong Pasko ug sa Bag-ong Tuig.

Apan sa tinuod lang, dunay pipila kanato ang nakakwarta og dako aning pandemiya, maayo lang unta og ipaambit sab nila kini ngadto sa ilang mga silingang nag-ilaid na karon sa kalisod.

Ang kapaskohan, panahon sa pagpaambit ug pagbati para sa uban. Dili kinahanglang dako o gamay ang matunol kay wala man kini apil sa kwentada kondili ang gibuhat para ngadto isi’g ka ingon.

Ang tanan nagsakripisyo ning panahon sa pandemiya apan dili tanan parehas og kadako sa nawala ug sa nadawat mao nga isip Kristiyano ug agi og pagpakita og maayong gawi, ipaambit ang grasya ngadto sa uban.