Caravan ni BBM-Sara nagtug-an sa tinuod

Sa usa ka pagpakigpulong, si kanhi Senador Bongbong Marcos (BBM) mitug-an nga ang orihinal nilang sabot mao: siya ang padaganon pagka-presidente sa Pilipinas inig ka 2022 national election ug si Presidente Rodrigo Roa Duterte (PRRD) maoy iyang bise.

Apan pagpinaylanay na sa Certificate of Candidacy (COC), nahibulong siya. Kay imbes mopayil si PRRD og kandidatura pagka-bise presidente, si Senador Bong Go man hinuon ang gihulip.

Taas kaayog respeto si BBM ni PRRD. Busa, nagpaabot siyag pipila ka adlaw nga kuhiton ni PRRD ug pasabton sa maong kausaban. Pero wala kini mahitabo. Unya, ang deadline sa COC, nagakaduol na ra ba.

Basin bayag sa iyang punay’g pinaabot, dili na hinuon siya makapayil. Busa, sa wala pa mag-Oktubre 8, nakahukom si BBM nga mopayil na lang og COC pagka-presidente. Apan mipasabot nga makig-aliyansa gihapon siya ni PRRD.

Pag-abot sa Oktubre 8, kataposang adlaw sa pinaylanay, sa mga nahabiling yugto, mi-file si Senador Bato de la Rosa og COC pagka-pangulo ubos sa PDP-Laban Cusi faction, isip standard bearer sa administrasiyong Duterte.

Ang berdeng sininang gisul-ob ni Senador Bato nga iyaha sa Hugpong Ng Pagbabago (HNP) nakahatag og ideya sa mga ‘Run Sara Run’ supporters nga si Bato giandam ra para mahatagag luna si Davao City Mayor Inday Sara Duterte-Carpio, kinsa gituohang mopayil og COC pagka-presidente inig abot sa gikatakdang mga adlaw sa substitution of candidates.

Apan sa naghinapos nga adlaw sa substitution of candidates, nahingangha ang tanan. Kay si Inday wala molingkod sa kinatas-ang puwesto nga giandam daan sa iyang amahan para niya.

Hinunoa, nag-bise presidente lang ubos sa Lakas-CMD ug nakig-tandem ni BBM.

Wala ikahimuot ni PRRD ang BBM-Sara tandem. Pero gikalipay kaayo kini sa kinabag-ang duot sa katilingban, kinsa mao mismoy nanawagan-pili nila ni BBM ug Inday nga magkauban pagkandidato sa nagsunod nga kinatas-ang puwesto sa gobiyerno sunod tuig.

Ug gipakita ang todo nilang suporta pinaagi sa pagpahigayog BBM-Sara caravan sa nagkadaiyang dapit sa Pilipinas, diin mibaha sa kadalanan ang taas kaayong kutay sa mga BBM-Sara supporters.

Wala pa gani eleksiyon, ang BBM-Sara caravan nagtug-an na sa tinuod kinsang kandidatoha sa pagka-presidente ug pagka-bise ang gimahal-iboto sa kinabag-an? Mapugngan pa kaha kini?