Kinsa ang nagbudhi sa nasud?
Kinsa man ang nipasalig sa China nga papahawaon na gikan sa Ayungin Shoal ang BRP Sierra Madre? Dako gyod tingali nga opisyal sa gobyerno nga may igo nga gahom sa pagtakda sa direksiyon sa relasyon sa atong nasud ug sa ubang kanasuran kay nituo ug naningil na man nga tumanon ang saad.
Di tingali lokal nga opisyal sa Palawan nga kinadul-an sa Ayungin ug di tingali mangingisda sa West Philippine Sea. Kay pulos sila way labot sa pag-umol sa foreign policy sa nasud. Kinsa mang opisyal ang naghupot sa maong gahom?
* * *
Ambot kinsay nangopya nila. Pero ang blind item ni Foreign Ministry spokesperson Zhao Lijian sa China parte sa Ayungin Shoal giluwatan pila lang ka adlaw human sa blind item ni Presidente Rodrigo Duterte labot sa presidentiable nga tigamitan og cocaine.
Managsama silang Lijian ug Duterte nga wa magtagad paghatag og dugang detalye sa seryuso nilang mga pasangil. Pulos sab sila napakyas sa pagpakita og bisan unsa nga piraso sa ebidensiya sa pagmatuod sa ilang mga pangangkon. Hinaot makasabot mong di ni igong babag sa pagsusi sa pasangil sa China.
* * *
Makatabang nato ang pagmubo sa listahan sa mga opisyal nga mahimo nga mao ang gipasanginlan ni Lijian:
Ang opisyal suod gyod tingali sa China kay nakaduol ug nakaluwat man sa importante nga pasalig ngadto sa labing dagko nilang mga tagduma; ug
Ang opisyal naghupot gyod tingali og taas nga katungdanan ug dakong gahom kay nakakumbinser man sa kadagkoan sa China nga tumanon sa gobyerno sa Pilipinas ang iyang pasalig.
* * *
Makahimong mas sayon ang pag-ila sa opisyal nga, kon tinuod ang pasangil sa tigpamaba sa Foreign Ministry sa China, kapasanginlan nga nagbudhi sa nasud ang pagtubag sa mosunod nga mga pangutana:
Kinsa man ang opisyal sa administrasyon nga mao ang naghupot sa gahom sa pag-umol sa foreign policy sa Pilipinas?; ug
Kinsa man ang opisyal sa administrasyon nga, bisan sa opisyal nga baruganan sa gobyerno sa pagpanalipod sa desisyon sa Permanent Court of Arbitration sa The Hague nga nipatigbabaw sa atong pagpanag-iya sa West Philippine Sea, nagpakita og mga timaan sa sulti o aktuwal nga lihok nga tua kapusta sa China?
* * *
- Latest
