Richard ug Niña

Malipay kita nga mimenos na ang mga kaso sa coronavirus dinhi sa Cebu City, apan 1,442 na diay ang nangamatay sa maong sakit sukad niadtong miaging tuig.

Pero nindot kay “two figures” na lang ang matakboyan sa usa ka adlaw sa tibuok Cebu City ug bisan na sa ubang siyudad sa Central Visayas.

Ang tinuod, ingon sa mikagiw na ang kahadlok sa mga tawo sa COVID-19, ilabi na kadtong mga nakahuman na sa pagpabakuna.

Ambot og tinuod ba nga sa Bohol, 20 man kuno ka tawo ang namatay kaniadto lang Oktubre 14. Ang Department of Health mireport sab nga 1,083 ang active nga mga kaso sa COVID-19 sa Bohol.

Apan ang Bohol Inter-Agency Task Force miingon nga kapin na lang sa 700 ang active cases. Pagkakaron, ang makasulod sa Bohol kadto ra nga makapakita og bag-ong negative swab test results.

Awhag nako nga motuman lang gyud ta sa health protocols sama sa pagsul-ob gyud og face mask, unya ayaw kaayo pakigdikit.

* * *

Tan-aw nako, apektado gyud ang kandidatura ni Konsehal Niña Mabatid pagka kongresista sa Cebu City north district, kay midagan man sab sa mao nga katungdanan si Richard Yap.

Ang mobotar kang Niña ug Richard mao ang mga dumadapig nila ni Mayor Edgar Labella ug Vice Mayor Mike Rama. Sa ato pa, mabuak ang botos kay ang ilang mga supporters magpili ra man gyud kon asa sila nila ni Niña ug Richard mobotar.

Pero kang Cutie Del Mar nga maoy kandidato sa Bando Osmeña Pundok Kauswagan (BOPK), sa pagka kongresista sa north district, tibuok nga botos sa mga supporters nila ang iyang maangkon.

Pagkakaron lang gud, nag-awayay na ang pipila ka supporters nilang Niña ug Richard.

Didto sa Cebu City south district, ang iladong mga kandidato mao sila si Tommy Osmeña ug Konsehal Edu Rama, apan naa kuno’y ikatulo nga gituohan nila nga dummy para sa “substitution.”

Gituohan nga usa ka abogado nga dugay ra nga nagtinguha nga mapili nga kongresista sa south district maoy mo-substitute sa maong dili iladong kandidato.

Pagka mayor sa Cebu City, si Mike Rama nag-agi na pagka mayor, ug ang iyang mga kaatbang pulos sab mga ilado, sila si Cebu City Councilor Dave Tumulak ug kanhi konsehal Margot Osmeña.

Ang nindot gyud unta mao nga si Tommy gyud ang moatbang ni Rama ug si Margot maoy mag kongresista sa south district.

Apan naunsa ba nga si Tommy man sab ang modagan pagka kongresista sa south district. Maayo unta og mag-ilis sila sa daganan nilang pwesto.