_banat
^

Banat Opinyon

Unsaong pilian ug kontra sa bakuna

ARANGKADA - Leo Lastimosa - Banat

Ang labing epektibo nga paagi sa pagkumbinser sa mga nagpili og brands sa mga bakuna ug sa mga nisalikway gyod sa tanang bakuna batok sa COVID-19 mao ang pagtahud sa ilang mga sentimento di ang pag-insulto nila, pagtawag nila og bugo ug pagpasangil nila nga mga iresponsable.

Angay’ng paminawon ang ilang pagpasabot sa nagkalainlain nga sukaranan sa ilang pagbalibad sa mga bakuna. Dayon mapailubon nga tubagon ang ilang matag panagana, matag kabalaka ug matag kahadlok sa labing tukma nga kasayuran ginamit ang labing yano ug masabtan nga mga pung.

* * *

Mas katuohan ang mga argumento pabor sa pagpabakuna batok sa COVID-19, ginamit ang tanang bakuna nga gitugotan sa World Health Organization (WHO) ug sa Food and Drug Administration (FDA) sa nagkalainlaing kanasuran, kon angkunon nga di 100% nga luwas ug di 100% nga epektibo ang mga bakuna:

• Way bakuna nga hingpit nga luwas ug hingpit nga epektibo; pero

• Ang mga benepisyo sa tanang bakuna apil nang Sinovac ug Sinopharm sa China, nga napamatud-an sa makuti nga mga pagtuon, mas dako kay sa mga risgo sa negatibong mga epekto ngadto sa pasyente.

* * *

Makatabang kon ang mopasabot sa mga pilian ug kontra sa mga bakuna mao ang mga tawo nga ilang masaligan. Sama sa ilang mga doktor, mga magtutudlo, mga labaw sa mga kompaniya ug mga organisasyon, kaparian, katiguwangan ug mga opisyal sa gobyerno.

Mas paspas ang pagpakatap sa saktong kasayuran ug pagpasabot pinaagi sa social ug traditional media. Pero kinahanglan nga makanunayon ug malahutayon. Di sab makadaot kon dasonan sa pagpanuktok sa kabalayan ug mga pulong-pulong sa linawas o sa Zoom.

* * *

Lisod panalipdan ang legalidad sa mga sugyot nga ipamugos ang pagpamakuna sa tibuok populasyon. Pero mahimong mapatuman sa mga sektor nga direktang nagduma sa kahimsog sa publiko--sama sa healthcare workers, mga magtutudlo, mga polis, mga sundawo, ug mga kawani sa mga ahensiya sa gobyerno ug pribadong mga kompaniya nga tibuok adlaw nga magpaduol sa mga kustomer.

Mas makiangayon sab ang mga lagda nga magbuot nga ang makasud sa mga lugar nga labing sayon ang tinakdanay mao ang mga nabakunahan o ang mga makapakita og negatibo nga resulta sa PCR test nga ilang gasto.

* * *

leolastimosaa@gmail.com

COVID-19 VACCINE
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with