Magpabakuna

Sulod na sa pila ka semana nga nagmingaw ang mga vaccination centers dinhi sa dakbayan sa Sugbo ug sa ubang dapit sa Metro Cebu ug Central Visayas.

Sigun sa report sa Visayas Vaccination Operations Center (VVOC) mokabat lang sa 17 porsiyento ang ilang maabot sa gidaghanon sa ilang target nga mabakunahan  matag semana.

Tungod niini admitido si Dr. Mary Jean Loreche, tigpamaba sa VVOC, nga lisud makab-ot ang ilang tinguha nga makab-ot sa Sugbo ang herd immunity sa dili pa matapos ang tuig 2021.

Ang kahadlok sa publiko nga magpabakuna ug ang pagpamili og brand sa bakuna maoy sagad nga hinungdan  nganong nihit ang magpabakuna.

Sukwahi sa unang mga buwan pagsugod sa vaccination program sa gobiyerno batok sa COVID-19, karon duna nay igong gidaghanon sa supply sa bakuna.

Gani matud sa VVOC mokapin na sa 4 milyones ka doses sa bakuna ang niabot dinhi sa Central Visayas.

Daghan na ang atong supply sa bakuna apan ang problema nihit na sab ang gustong magpabakuna.

Dako ning hagit sa mga lokal nga kagamhanan unsaon pagdasig ang publiko nga magpabakuna.

Dili mahimong pasagdan nga dyutay ra ang moadto sa mga vaccination center tungod kay mas madugay ang atong pangandoy nga mabalik sa normal ang atong mga kalihukan.

Dili ta mahibalik sa normal samtang daghan pa ang wala mabakunahi.

Ang pagpabakuna mao lay bugtong yawe aron mabalik sa hingpit ang naandan tang kinabuhi.

Tingali panahon na aron ang mga local government units mohimo og mga lakang aron mapugos ang publiko pagpabakuna.

Usa sa maayong pamaagi aron mapugos ang mga nag-ukon-ukon pagpabakuna mao ang pagrequire sa vaccination card sa tanang transaksiyon.

Pananglitan kadto lang dunay vaccination card ang tugotan nga makasakay sa public transport. Kadto lang bakunado ang tugotan nga makapangopra sa merkado ug makasulod sa mga establishemento.

Tinuod katungod sa matag-usa ang paghukom magpabakuna ba o dili, apan obligasyon sab sa kagamhanan nga protehian ang iyang mga residente gikan sa makamatay nga sakit.

Ug husto ang sugyot sa Archdiocese of Cebu nga atol sa kalag-kalag kadto lang mga bakunado ang tugotan nga makasulod sa sementeryo karong Nobiyembre 1 ug 2.

Hinaut mahimo ning sinugdanan aron mapugos ang katawhan nga magpabakuna.