BBM-PRRD tandem?

Sa wala pa ang pagpinaylanay og Certificate of Candidacy (COC), gipahibalo sa PDP Laban-Cusi faction nga si Senador Bong Go maoy ilang padaganon sa pagkapangulo samtang si Presidente Rodrigo Roa Duterte (PRRD) maoy bise. Si Senador Go, sa sinugdanan, hasta kapila mipahayag nga dili siya magpapiling presidente. Gawas lang kaha, kon si PRRD maoy iyang ma-running mate.

Tuod man, pag-abot sa gikatakdang filing of COC, nagkuyog si PRRD ug Go didto sa venue, diin gipahigayon ang maong kalihokan. Apan nakurat ang publiko dihang ang mipayil og COC, si Senador Bong Go ra, samtang si PRRD, wala! Unya, pagka-bise presidente pa ang gipayil ni Senador Go. Ug dili pagka-presidente.

Kinsa man diay ang padaganon pagka-presidente sa ilang partido? Si Davao City Mayor Inday Sara Duterte-Carpio? Si kanhi Senador Bongbong Marcos (BBM)? Pero, dili baya ni sila sakop sa PDP Laban?

Mga pangutanang nakahasol sa solidong Diehard Duterte Supporters, kinsa gustong maumol ang BBM-Duterte tandem aron ikapadayon ang daghang mapuslanong proyekto nga gihuman, nahuman ug humanonon ubos sa Build Build Build program ni PRRD.

Matud pa ni BBM, kinsa pro-administration, sa hilom, hagbay ra nilang giplano nga hiusahon nila ang Marcos-PRRD tandem. Apan naguba kini dihang mibak-awot si PRRD pagkandidato isip bise-presidente ug nagpapuli ni Senador Go. Wala dayon mopayil si BBM og COC kay nagpaabot siya sa hukom ni Inday Sara, kon molansar ba kini pagka-pangulo? Higala ni BBM ang mga Duterte. Ug andam siya nga makig-tandem ni Inday.

Apan hagbay rang giklaro ni Inday nga dili siya modagan pagka-presidente. Ug iyang gimatuod dihang mipayil siya’g COC sa Davao City isip kandidato pagka-mayor. Hinungdan nga mipayil na lang usab si BBM og COC para pagka-presidente. Pangutana: Wala na bay kahigayonang madayon ang BBM-PRRD tandem?

May chance gihapon. Timan-i. Si Sen. Bato dela Rosa (PDP Laban) mipayil og COC pagka-presidente sa kataposang minuto. Ang maong special slot may gipreparahan. Dili para kang Inday Sara. Kondili, alang ni BBM. Usab, may purohang si Senador Go magpa-substitute ni PRRD. Busa, inig ka Nobiyembre 15, kataposang adlaw sa pag-substitute og mga kandidato, dunay posibilidad nga matuman gayod ang BBM-PRRD tandem.

Hinuon, pangagpas ra kining akoa. Mahimong matinuod. Mahimong dili. Atong atngan!