Thrilling ug interesting

Inanay nang mihugpa ang aso sa politika ug klaro na nga si Cebu City Vice Mayor Michael Rama ug kanhi konsehal Margot Osmeña maoy magsangka sa kumbati pagkamayor sa dakbayan sa eleksiyon sa Mayo sa sunod tuig.

Pulos lig-on ang isig ka kandidato ug makasiguro kita nga kulba-hinam ang ilang panagsangka alang unya sa labing taas nga puwesto sa siyudad. Rematch na usab kini tali sa Barug ug Bando Osmeña Pundok Kauswagan, ang duha ka dominante nga local political party.

Unsay advantage ni Osmeña? Of course, ang iyang pagkainahanon nga pag-atiman sa mga affairs sa siyudad sa dihang first lady pa kini sa taas nga panahon ug sa dihang nahimo usab siya nga konsehal. Sayon usab kini nga duolon.

Apan kinahanglan nga mobuwag si Osmeña gikan sa anino sa iyang bana, si kanhi mayor Tomas Osmeña, kung gusto siyang modaug sa piniliay. Kinahanglan nga adunay kaugalingon imahe si Margot nga layo sa iyang bana, kinsa atong nang nailhan nga usa ka estrikto sa iyang pagpangatungdanan.

Ug unsa usab advantage usab ni Rama? Well, ang iyang pagka-friendly maoy nag-unang asset sa iyang pagkapolitiko. Sayon usab kini nga duolon, butang nga napamatud-an na sulod sa iyang termino pagkamayor ug ubang posisyon diha sa City Hall.

Gumikan kay siya ang nagdala sa renda sa pangagamhanan sa siyudad isip acting mayor, dako ang bintaha ni Rama batok kang Margot Osmeña. Kini tungod lagi kay anaa kaniya ang dakong makinarya sa City Hall.

Hinuon gamiton gayud sa BOPK ang tanan aron nga mapukan ang kasamtangang administrasyon sa dakbayan ug mabalik sa poder. Mao nang si Margot ang ilang gituboy isip standard bearer kay mas taas ang tsansa niini nga modaug.

Apan mas beterano si Rama ikumpara ni Margot. Gani presko pa sa atong panumdoman ang iyang pagdaug batok kang Tomas sa milabay nga mga eleksiyon. Tungod niini, makasiguro kita nga thrilling ug interesting gayud ang umaabot nga piniliay dinhi sa dakbayan.